2026-yilning 1-iyunidan boshlab Sankt-Peterburgdagi Pulkovo aeroportida biometriya orqali ustuvor oʻtish tizimi joriy etiladi. VTB banki va Biometrik texnologiyalar markazi hamkorligida ishlab chiqilgan “Migom” servisi yoʻlovchilarga hujjatlarsiz harakatlanish imkonini beradi. Bu haqda Ixbt.com xabar beradi.
Yangi tizim yordamida yoʻlovchilar roʻyxatdan oʻtish, ichki reyslar kutish zaliga kirish va samolyot bortiga chiqish jarayonlarini faqat biometrik maʼlumotlar asosida amalga oshirishlari mumkin. Hozirda ushbu xizmat Peterburg va Moskva oʻrtasidagi “Aeroflot Shuttl” reyslarida test rejimidan oʻtmoqda.
VTB xodimlari Pulkovo roʻyxatga olish zallarida biometrik maʼlumotlarni topshirishda yordam berishadi, bu jarayon taxminan 10 daqiqa vaqt oladi. Shundan soʻng, “Aeroflot” saytidagi shaxsiy kabinet orqali biometriyadan foydalanishga ruxsat berish va uni chiptaga bogʻlash talab etiladi.
Prognozlarga koʻra, 2028-yilga borib aeroportda 4 millionga yaqin kishi biometrik servisdan foydalanadi. “Vozdushniye Vorota Severnoy Stolitsi” MChJ bosh direktori Leonid Sergeyevning taʼkidlashicha, bu yoʻlovchilar uchun toʻliq “toʻsiqsiz muhit” yaratish yoʻlidagi birinchi qadamdir.
Tasdiqlangan biometrik maʼlumotlar pasportga tenglashtiriladi va 5 yil davomida amal qiladi. Maʼlumotlarni banklar yoki koʻp tarmoqli markazlarda topshirish imkoniyati mavjud.
“Zamin”ni Telegramʻda oʻqing!
