AQSH Prezidenti Donald Trump sunʼiy intellekt (AI) modellarini ommaga taqdim etishdan avval hukumat tomonidan tekshirilishini koʻzda tutuvchi ijrochi farmonni imzolashni ortga surdi. Trump hujjatning hozirgi tahriridan qoniqmayotganini va bu sohadagi yetakchilikka zarar yetkazishni istamasligini maʼlum qildi. Bu haqda Techcrunch.com xabar beradi.
“Menga farmonning ayrim jihatlari maʼqul kelmadi”, — dedi Trump Oq uy matbuot xizmati vakillariga. Uning taʼkidlashicha, AQSH hozirda Xitoy va boshqa davlatlardan sunʼiy intellekt poygasida oldinda bormoqda va u ushbu yetakchilikka toʻsqinlik qiladigan har qanday qadamdan tiyilmoqchi.
Norasmiy maʼlumotlarga koʻra, farmonning kechiktirilishiga texnologik kompaniyalar rahbarlarining qisqa vaqt ichida Vashingtonga kela olmagani ham sabab boʻlgan. Kutilayotgan farmon Milliy kiberdirektor idorasi va boshqa agentliklarga AI modellarini xavfsizlik nuqtayi nazaridan baholash jarayonini ishlab chiqish vazifasini yuklashi kerak edi.
Ushbu chora-tadbirlar Anthropic kompaniyasining Mythos va OpenAIʼning GPT-5.5 Cyber modellari chiqarilishi ortidan paydo boʻlgan xavotirlarga javobdir. Mazkur modellar kiberxavfsizlikdagi zaifliklarni tezda topish va ulardan foydalanish imkoniyatiga ega ekani aytilmoqda.
CNN xabariga koʻra, farmondagi eng bahsli bandlardan biri — AI kompaniyalari oʻzlarining ilgʻor modellarini ishga tushirishdan 14 kundan 90 kungacha boʻlgan muddatda hukumatga taqdim etish talabidir. Trump ushbu talab texnologik rivojlanish uchun “toʻsiq” boʻlishi mumkinligidan xavotirda.
“Zamin”ni Telegramʻda oʻqing!
