KamAZ va KRET kompaniyalari elektrobuslar uchun shahar transporti tizimini tubdan oʻzgartirishi kutilayotgan yangi FORA "Tungi quvvatlash" stansiyasini namoyish etdi. FORA EZS-DC-4M deb nomlangan ushbu qurilma 160 kW quvvatga ega boʻlib, maxsus tungi vaqtda texnikalarni quvvatlantirish uchun moʻljallangan. Bu haqda Ixbt.com xabar beradi.
Loyiha doirasida elektrobuslarning quvvatini toʻliq tiklash uchun taxminan 2,5 soat vaqt sarflanadi. Mazkur yechim anʼanaviy ultra-tezkor quvvatlash majmualaridan sezilarli darajada arzonroq ekanligi bilan ajralib turadi. Loyihaning asosiy gʻoyasi — elektr energiyasi tariflari minimal boʻlgan tungi vaqtda transportlarni quvvatlashdir.
Buning sharofatida tashuvchilar xarajatlarni kamaytirishi va transport samaradorligini oshirishi mumkin boʻladi. Endilikda elektrobuslar kunduzi quvvatlash terminallari yonida uzoq vaqt toʻxtab turishiga hojat qolmaydi. Yangi stansiya 0 dan 750 V gacha kuchlanishda ishlaydi va 250 A gacha tok kuchini qoʻllab-quvvatlaydi.
Ishlab chiquvchilar qurilmada bir necha darajali himoya tizimlarini, jumladan, ortiqcha yuklanish, qisqa tutashuv va kuchlanish oʻzgarishlaridan himoyalashni koʻzda tutgan. Uskuna -30 dan +45 °C gacha boʻlgan haroratda ishlashga moʻljallangan boʻlib, namlik va changdan qoʻrqmaydi. Avtorizatsiya uchun RFID-karta yoki maxsus mobil ilovadan foydalanish mumkin.
“Zamin”ni Telegramʻda oʻqing!
