Gidravlik shtift bilan bogʻliq muammo tufayli qoldirilgan Starship parvozi boʻyicha ishlar yakunlandi. AQSH Federal aviatsiya boshqarmasi (FAA) SpaceX kompaniyasining Starship FLT-12 missiyasi uchun parvoz oynasini bugun, 22-may sanasiga tasdiqladi. Agar texnik sabablarga koʻra start bugun amalga oshmasa, keyingi imkoniyat faqat 26-may kuni boʻladi. Bu haqda Ixbt.com xabar beradi.
Avvalroq Elon Musk xizmat koʻrsatish minorasining gidravlik mexanizmidagi nosozlik tufayli parvoz kechiktirilganini maʼlum qilgan edi. Shtift kutilganidek harakatlanmagani sababli raketani uchirish imkonsiz boʻlib qolgandi. Muhandislar ushbu nosozlikni bir kun ichida bartaraf etishga muvaffaq boʻlishdi va tizim yangi start oynasiga shay holatga keltirildi.
SpaceX kosmodromidan olingan yangi suratlar dunyodagi eng yirik raketa hisoblangan Starship Flight 12 ikkinchi start maydonchasida parvozga tayyor turganini koʻrsatmoqda. Shu bilan birga, kompaniya bir xil bazaviy dizaynni turli vazifalar uchun qanday moslashtirayotganini namoyish etuvchi uch xil modifikatsiyadagi kemalar renderini ham eʼlon qildi.
Elon Muskning soʻzlariga koʻra, hozirda Starbase kosmodromida katta miqdordagi Starship V3 raketalari va yangi avlod Super Heavy tezlatkichlari bir vaqtning oʻzida yigʻilmoqda. Kompaniya rahbari yigʻilayotgan raketalarning aniq sonini ochiqlamagan boʻlsa-da, ishlab chiqarish surʼati sezilarli darajada oshganini taʼkidladi.
“Zamin”ni Telegramʻda oʻqing!
