2025 йилнинг январ–сентябр ойларида Ўзбекистондан 2,36 миллион меҳнат мигранти чиқиб кетди. Бу кўрсаткич 2024 йилнинг шу даврига нисбатан 4 фоизга кўп.
Ушбу маълумотни Ўзбекистон Марказий банки Тўлов баланси департаменти директор ўринбосари Азизбек Ҳайитов IFAD ва Марказий банк томонидан ўтказилган пул ўтказмалари бўйича конференцияда маълум қилди. Миграция оқимининг 92 фоизи (2,2 миллион киши) учта асосий давлатга тўғри келади.
Ушбу давлатлар Ўзбекистон фуқаролари учун вақтинчалик иш билан таъминланиш борасида асосий йўналиш бўлиб қолмоқда. Шу билан бирга, меҳнат миграцияси йўналишларининг аста-секин диверсификация қилинаётгани кузатилмоқда.
Айрим давлатларда меҳнат мигрантлари сонининг сезиларли ўсиши қайд этилди. Йўналишларнинг ривожланиши Германия, Қувайт, Франция, Жанубий Корея, Италия, Буюк Британия, Япония ва Швеция билан ҳукуматлараро ишга жойлашиш каналларининг кенгайиши билан боғлиқ.
Мутахассислар пул ўтказмаларининг харажатларини камайтириш ва мигрантлар оилаларининг молиявий барқарорлигини ошириш бўйича тавсияларни тақдим этди. Жумладан, пул ўтказмаларини кредитга лаёқатлиликни баҳолашда муқобил даромад манбаи сифатида қўллаш таклиф қилинди.
IFAD ва Марказий банкнинг қўшма дастурлари молиявий саводхонликни ошириш ҳамда харажат ва жамғарма режалаштириш кўникмаларига қаратилган. IFAD халқаро ҳамкорликдан фойдаланиб, халқаро тўлов тизимлари ва хорижий банклар тарифларини камайтириш бўйича музокаралар олиб боришни таклиф қилмоқда.
Меҳнат миграциясининг ўсиши мамлакат иқтисодиётида муҳим рол ўйнаётган пул ўтказмалари кўрсаткичларини қўллаб-қувватламоқда. Конференцияда тақдим этилган маълумотларга кўра, 2025 йилнинг январ–октябр ойларида пул ўтказмалари 15,8 миллиард АҚШ долларига етди.
Бу ўтган йилга нисбатан 25 фоизга кўп. Умуман олганда, 2025 йил охирига бориб, глобал пул ўтказмалари ҳажми 913 миллиард АҚШ долларига етиши кутилмоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
