Bosch компанияси Mercedes-Benz билан янги электромобиллар учун электр двигателлар етказиб бериш бўйича кўп йиллик шартнома имзолади. Келишув камида 2030-йилларгача амал қилади ва оммавий моделлардан тортиб премиум тоифадаги ЭВ-автомобилларгача бўлган кенг қамровни ўз ичига олади. Bosch учун ушбу битим компаниядаги фойда пасайиши ва ходимларни қисқартириш режалари фонида ўта муҳим стратегик қадам ҳисобланади. Бу ҳақда Ixbt.com хабар беради.
Янги электр моторларнинг асосий устунлиги уларнинг юқори самарадорлигидадир — фойдали иш коэффициенти 98 фоизга етади. Бунга янгиланган чулғам конструкцияси ва роторни мой билан совутиш тизими орқали эришилди. Мой иссиқликни самаралироқ чиқариб юборишга ёрдам беради, натижада двигателни ихчамроқ қилиш, қувватни ошириш ва энергия йўқотилишини камайтириш имкони туғилади.
Яна бир муҳим жиҳат — модулли архитектура. Bosch турли турдаги автомобиллар, узатмалар ва ўқ конфигурацияларига мослаштирилиши мумкин бўлган универсал платформани ишлаб чиқди. Автоишлаб чиқарувчилар учун бу интеграция жараёнини соддалаштиради ва янги моделларни ишлаб чиқиш харажатларини сезиларли даражада камайтиради.
Ҳозирги вақтда Bosch дақиқасига тахминан еттита электр двигател ишлаб чиқармоқда ва электромобиллар учун бутловчи қисмлар тайёрлаш ҳажмини фаол равишда оширмоқда. Компания режаларига кўра, 2026-йилга бориб электр узатмалари учун деталлар ишлаб чиқариш ҳажми 7 миллион донадан ошади.
“Zamin”ни Telegram'да ўқинг!
