Андижон вилояти Жалақудуқ туманида икки автомобиль иштирокида йўл-транспорт ҳодисаси содир бўлди. Тўқнашув оқибатида машиналардан бири йўл четидаги зовурга тушиб кетган. Яхши томони, ҳодисада инсонлар тан жароҳати олмаган.
Маълумотларга кўра, воқеа 10 май куни тахминан соат 16:20ларда Жалақудуқ тумани “Беш карам” МФЙ ҳудудидан ўтган D-138 автомобиль йўлида юз берган.
Ҳайдовчи М.Н. бошқарувидаги “Дамас” русумли автомашина иккинчи даражали йўлдан асосий йўлга кескин чиқиб юборган. Шу пайт асосий йўлдан ҳаракатланиб келаётган “Ласетти” автомашинаси билан тўқнашув содир бўлган.
Зарба оқибатида “Ласетти” ҳайдовчиси рул бошқарувини йўқотган ва автомобиль йўл четидаги зовурга тушиб кетган. Ҳодиса натижасида ҳар икки транспорт воситаси техник шикастланган.
Энг муҳими, авария оқибатида ҳайдовчилар ва йўловчилар тан жароҳати олмаган. Бу каби ҳолатларда бир неча сониялик эътиборсизлик анча оғир оқибатларга олиб келиши мумкин. Бу сафар эса вазият, шукрки, фақат темир-терсак зарари билан якунланган.
Ҳолат юзасидан Жалақудуқ тумани ИИБ ЙҲХГ ходими томонидан суриштирув ишлари олиб борилмоқда. Мутахассислар йўл-транспорт ҳодисаси сабаблари, ҳайдовчиларнинг ҳаракати ва йўл ҳаракати қоидаларига риоя қилинган-қилинмаганини ўрганмоқда.
Бу воқеа ҳайдовчиларга яна бир бор муҳим қоидани эслатади: иккинчи даражали йўлдан асосий йўлга чиқишда шошилиш керак эмас. Йўлда “улгуриб қоламан” деган фикр баъзан жуда қимматга тушади. Асосийси — тезлик эмас, хавфсизлик.
“Zamin”ни Telegram'да ўқинг!
