Буюк Британия ҳукумати ҳайдовчиларни ёқилғи қуйиш шохобчаларидаги нархлар ошишидан ҳимоя қилиш мақсадида ёқилғи солиғини (фуел дутй) ошириш режасини йил охиригача тўхтатиб туришга қарор қилди. Канцлер Рачел Реэвес 2022-йилда жорий этилган 5 пенслик чегирмадан воз кечиб, амалдаги 52,95 пенслик ставкани оширишни режалаштирган эди. Бу ҳақда Autocar.co.uk хабар беради.
Дастлабки режага кўра, жорий йилнинг сентябрь ойида солиқ 1 пенсга, кейинги олти ой давомида эса тўлиқ 5 пенсга ошиши керак эди. Бироқ, ҳукумат Эрон можароси туфайли ёқилғи нархи кўтарилаётган бир пайтда солиқларни паст даражада ушлаб туриш учун ушбу чегирма муддатини узайтиришга қарор қилди.
Бош вазир Кеир Стармер кўпчилик энергия ва ёқилғи харажатлари босимини ҳис қилаётганини ҳамда глобал воқеалар нархларга таъсир қилганда, биринчи навбатда меҳнаткаш халқ зарар кўришини таъкидлади. Унинг сўзларига кўра, ушбу чора миллионлаб ҳайдовчиларнинг харажатларини камайтиришга хизмат қилади.
Эслатиб ўтамиз, 5 пенслик чегирма илк бор 2022-йилда Россиянинг Украинага бостириб кириши ортидан жорий этилган эди. Ҳукумат, шунингдек, юк ташувчилар учун ҳам енгиллик яратиб, 12 ойлик йўл солиғи таътилини эълон қилди. Эндиликда юк машиналари эгалари янгилаш вақтида 912 фунт ўрнига рамзий 1 фунт тўлайдилар.
“Zamin”ни Telegram'да ўқинг!
