Якшанба куни Флоридада ноодатий воқеа юз берди. Дональд Трампнинг Мар-а-Лаго резиденциясидан Палм-Бич халқаро аэропортига йўл олаётган президент кортежи давомида қизиқ ҳолат кузатилди.
Гувоҳлар томонидан олинган суратларда "The Beast" ("Йиртқич") деб номланувчи Cadillac зирҳли автомобили очиқ юкхона билан ҳаракатланаётгани акс этган. Бу вақтда Дональд Трамп автомобилнинг орқа ўриндиғида бўлган.
Ушбу сурат ижтимоий тармоқларда тез тарқалиб, механик носозлик ёки хавфсизлик протоколи бузилган бўлиши мумкинлиги ҳақида кўплаб тахминларни келтириб чиқарди. Кейинчалик АҚШ Махфий хизмати ҳодисага изоҳ бериб, бу механик носозлик бўлганини ва муаммо ҳал қилинганини маълум қилди.
"Ҳаракат давомида ҳеч қандай нарсага зарар етмаган ва ҳеч нарса йўқотилмаган," дейилади идора баёнотида. Президент лимузини "The Beast" дунёдаги энг хавфсиз автомобиллардан бири ҳисобланади.
Унинг оғирлиги 9 тоннага яқин бўлиб, 20 см қалинликдаги зирҳ билан ҳимояланган. Шунингдек, автомобиль кимёвий ва биологик қуроллардан ҳимоя тизимлари билан жиҳозланган.
