Жасанды интеллект саласындағы жетекші компаниялардың бірі Anthropic шағын және орта бизнес өкілдеріне арналған Claude for Small Business қызметін іске қосты. Ірі корпорациялардан айырмашылығы, бұл жаңа шешім жергілікті дүкендер мен шағын қызмет көрсету орындарының қажеттіліктеріне бейімделген. Бұл туралы Techcrunch.com хабарлайды .
Жаңа функциялар Claude Cowork платформасы арқылы ұсынылады. Пайдаланушылар бұл арқылы бухгалтерлік есеп, бизнес-талдау және жарнамалық науқандар үшін генеративті құралдарды пайдалана алады. Сондай-ақ, жүйе QuickBooks, Canva, Docusign, HubSpot және PayPal сияқты танымал бағдарламалармен интеграцияланған.
Anthropic деректері бойынша, шағын бизнес АҚШ ЖІӨ-нің 44 пайызын құрағанымен, жасанды интеллект технологияларын енгізуде ірі компаниялардан қалып келеді. Компания бұл олқылықты толтыру үшін АҚШ-тың 10 қаласында тегін оқыту семинарларын ұйымдастыруды жоспарлап отыр.
Бұл қадам OpenAI компаниясының ChatGPT Business шешіміне бәсекелестік ретінде бағалануда. Нарық сарапшыларының пікірінше, жасанды интеллект платформалары арасындағы күрес енді ірі корпорациялардан шағын бизнес сегментіне ауысуда.
“Zamin”-ді Telegram-нан оқыңыз!
