Нөмірді анықтау қызметімен танымал Truecaller компаниясы саяхатшылар үшін eSIM қызметін іске қосты. Бұл қадам жарнамалық түсімдер азайып бара жатқан тұста компанияның қаржылық жағдайын нығайтуға және бизнес бағыттарын әртараптандыруға бағытталған. Компания деректері бойынша, тарифтік жоспарлар 7 күнге 1 ГБ-тан 30 күнге 20 ГБ-қа дейінгі көлемдерді қамтиды. Бұл туралы хабарлайды Techcrunch.com.
Алғашқы кезеңде eSIM өнімі 29 елде, соның ішінде АҚШ, Ұлыбритания, Германия, Франция, Италия және Индонезия сияқты мемлекеттерде жұмыс істейді. Қызығы, Truecaller үшін ең ірі нарық саналатын Үндістан бұл тізімге енгізілмеген. Бұл елдегі қатаң телекоммуникациялық ережелерге байланысты болуы мүмкін, өйткені бұған дейін Үндістан үкіметі Airalo және Holafly сияқты сервистерді бұғаттаған болатын.
Truecaller бұл платформаны жүргізу үшін жаһандық байланыс провайдері Telna және бағдарламалық қамтамасыз етуді әзірлеуші Telness Tech компанияларымен серіктестік орнатуда. Нарықта Airalo, Holafly және NordVPN ұсынған Saily сияқты бәсекелестер болғанымен, Truecaller өзінің 500 миллионнан астам белсенді қолданушы базасына сүйенеді.
Компанияның операциялық директоры Фредрик Кьелл қолданыстағы аудитория жаңа қолданушыларды тартуда үлкен артықшылық беретінін атап өтті. Truecaller соңғы уақытта қаржылық қиындықтарға тап болуда: өткен аптада 70 жұмыс орны қысқартылды, ал бірінші тоқсанда таза сатылым көлемі 27 пайызға, жарнамалық түсімдер 44 пайызға төмендеді.
Қазіргі уақытта компания AI Assistant және Family Protection сияқты функциялар арқылы жазылым түсімдерін арттыруға назар аударуда. Жарнама нарығы тұрақсыз болып тұрған шақта, eSIM сияқты қосымша қызметтер Truecaller үшін жаңа кіріс көзі болады деп күтілуде.
“Zamin”-ді Telegram-нан оқыңыз!
