Қытайлық ғалымдар жаңа буын күн панельдерін жасау жолында үлкен қадам жасады: олар пайдалы әсер коэффициенті (ПӘК) 33 пайыздан жоғары перовскит-кремнийлі күн элементін жасап шығарды. Жобаға Қытай Ғылым академиясы жанындағы Нинбо өнеркәсіптік материалдар және инженерия институты (NIMTE), Сучжоу және Тайчжоу университеттерінің мамандары мен S.C Exact Equipment Co. компаниясы қатысты. Бұл туралы хабарлайды Ixbt.com.
Технологияның негізгі идеясы кәдімгі кремний мен перовскит қабатын біріктіру болып табылады. Мұндай «тандемді» күн элементтері энергетиканың болашағы саналады, өйткені олар дәстүрлі кремний панельдеріне қарағанда бірдей ауданнан айтарлықтай көп энергия алуға мүмкіндік береді. Ұзақ уақыт бойы мұндай элементтердің басты мәселесі кремний негізінің конструкциясына байланысты болды.
Жарықты жақсырақ ұстау үшін кремний беті кедір-бұдырланып, микроскопиялық «пирамидалармен» қапталады. Алайда дәл осы құрылымдардың ұшында перовскит қабатының біркелкі жатпауы салдарынан ток жылыстауы және тұрақтылықтың төмендеуі байқалатын. Қытайлық зерттеушілер «селективті пассивация» әдісі арқылы бұл мәселені шешті. Полистирол шаршықтарының көмегімен кремний пирамидаларының ұшына алюминий оксидінен өте жұқа қорғаныш қабаты жағылды.
Нәтижесінде рекордтық тиімділікке қол жеткізілді. Салыстырмалы түрде, қарапайым сериялық панельдердің ПӘК көрсеткіші 20–23% шамасында болса, ең үздік коммерциялық шешімдер 24%-ды құрайды. Жаңа батарея төзімділік жағынан да жақсы нәтиже көрсетті: 1000 сағаттық үздіксіз жұмыстан кейін оның тиімділігі 90% деңгейінде сақталды. Ең бастысы, бұл технология қолданыстағы өнеркәсіптік желілерге сәйкес келеді, яғни өндірушілерге зауыттарды толығымен қайта құрудың қажеті жоқ.
“Zamin”-ді Telegram-нан оқыңыз!
