Президент Шавкат Мирзиёев Ташкент қаласының Юнусабад ауданында салынған ірі қуатты когенерация станциясының қызметімен танысты.
Елордада тұрғындар мен экономика нысандарын қысқы маусымда жылу энергиясымен тұрақты және үздіксіз қамтамасыз ету мақсатында бір мезгілде электр және жылу өндіретін бірқатар заманалық когенерациялық қондырғылар іске қосылуда.
Юнусабад ауданындағы 4-жылу орталығы аумағында мемлекеттік-жекеменшік әріптестік негізінде салынған қуаттылығы 100 МВт болатын бұл жоба осындай маңызды бастамалардың бірі.
Қытайдың "CNTIC" компаниясымен бірлесіп жүзеге асырылған жоба 3,5 гектар аумақта орналасты. Оны қаржыландыру үшін 65 миллион доллар тікелей шетелдік инвестиция бағытталды.
Мемлекет басшысы орталықтың жұмыс барысымен танысты.
Когенерациялық қондырғыға Ұлыбританияның "Rolls-Royce" компаниясының 70 газ-поршень қондырғысы орнатылды.
Жылу қазандықтарынан тұтынушыларға дейінгі жылумен жабдықтау инфрақұрылымы қайта жаңартылды. Жылу магистральдары жаңартылды. Желілер оқшауланған құбырлармен ауыстырылды. Бұл әртүрлі деңгейдегі энергия шығынын болдырмауға мүмкіндік береді.
Орталықтың іске қосылуы нәтижесінде жылына 876 миллион киловатт-сағат электр энергиясы мен 858 мың гигакалория жылу энергиясы өндіріледі. Сонымен қатар, жылына 35 миллион текше метр табиғи газ үнемделеді.
Енді астананың Юнусабад, Алмазар, Шайхантахур, Мирзо-Улуғбек және Яккасарай аудандарында орналасқан 1 мың 846 нысан тұрақты жылу энергиясымен қамтамасыз етіледі. Оның 1 мың 400-і - тұрғын үйлер, ал қалған бөлігі - әлеуметтік нысандар. Сондай-ақ 292 мың үйге электр энергиясы тұрақты түрде жеткізіледі.
Жоба іске қосылғаннан кейін жылу энергиясын өндіруге жұмсалатын шығындар 40-45 пайызға азаяды. Атмосфераға ластаушы заттардың мөлшері айтарлықтай азайып, ағынды сулардың лақтырылуы болмайды.
Мұнда Мемлекет басшысы күзгі-қысқы маусымға дайындық бойынша атқарылған жұмыстармен және жылу орталықтарын дамыту, Ташкент жылу электр станциясын жаңғырту, астанада абаттандыру жұмыстарын жетілдіру бойынша ұсыныстармен, сондай-ақ аномальды суық жағдайында қызметке тартылатын күштер мен құралдарды бөлу бойынша тұсаукесерлермен танысты.
Елордада 11 мың 630 көпқабатты үй бар. Оларға 358 басқарушы сервистік компания қызмет көрсетеді. Мемлекет басшысы олардың маусымға дайындығымен танысты.
- Қала жағдайында басқарушы сервистік компаниялардың қызметі тұрғындардың өмірімен тығыз байланысты. Сондықтан олар сағат механизміндей дәл, үздіксіз жұмыс істеуі керек. Ол үшін қажетті жағдайлар жасалуда. Енді сала қызметкерлерінің дүниетанымы мен көзқарасы да өзгеруі керек. Тұрғындардың жағдайын білу, көпқабатты үйлердің жертөлелері мен шатырларын, дәліздер мен ойын алаңдарын ретке келтіру қажет, - деді Президент.
Сондай-ақ энергетика, абаттандыру, құрылыс және қызмет көрсету салаларының жауапты тұлғаларына маусым барысында жүйелі және үйлесімді жұмыс істеу бойынша тиісті тапсырмалар берілді.
«Меҳмон» тобындағы келушілер бұл жарияланымға пікір қалдыра алмайды.
