"Эйнштейн" Тожикистондан нега кетганини биласизми?

Қатарда ўтказилган Осиё Кубогида Тожикистон миллий терма жамоаси билан янги тарих ёза олган хорватиялик “Эйнштейн” – бош мураббий Петр Сегрт барчанинг эътиборини ўзига қарата олди.

У кучли мотиваторлиги билан мухлисларда илиқ таассурот қолдирди, десак янглишмасак керак. Лекин таниқли мутахассис Осиё Кубогидан кейин Тожикистондан кетди. Бу эса барча учун кутилмаган янгилик бўлди.

- Жаноб Сегрт, Осиё Кубогидан кейин бир муддат вақт ўтди. Сиз эса кутилмаганда Тожикистон термасидан кетдингиз. Ниҳоят, бир қанча уринишлардан сўнг сиз билан яна боғландим. Нима бўлди, ўзи?
- Энг муҳими Осиё Кубогидан кейин ақлбовар қилмас даражада юзлаб қўнғироқлар ва хабарлар олдим. Бундан ташқари, ўзимда оилавий томондан шахсий муаммоларим бор эди. Уларни ҳал қилиш учун менинг бор эътиборим ҳамда энергиям талаб этиларди. Шу сабаб бўлди, дея оламан. Баъзида ҳаёт тез ўзгаради ва сизни бироз қаттиқроқ қарорлар қабул қилишга мажбур этади. Ҳаётда мана шу қарорлар билан биргаликда яшашга мажбурмиз. Бундай ҳолатларда ҳаётимиздаги биз билан бирга бўлаётган инсонларни унутмаслигимиз керак бўлади.

- Кетишингиз ўзингиз учун ҳам кутилмаган қарор бўлдими?
- Биринчи навбатда Тожикистон футбол федерациясига раҳмат айтишим керак. Улар менинг қароримни ҳурмат қилишди. Ўзим тушиб қолган шахсий вазиятимни тўғри қабул қилишди. Чунки бу менинг шахсий қарорим эди ва шунга кўра ўз йўлимни танладим. Федерация менга янги шартнома таклиф қилмоқчилигини, улар жамоадаги ривожланишдан кўнгиллари тўлганлигини айтишганди. Тўғриси, ўша вазиятда шахсий сабабларга кўра бундай қила олмасдим.

5 февраль куни биз улар билан учрашгандик. Мен билан ҳамкорликни давом эттиришмоқчилигини маълум қилишди. Сизга айтиб ўтганимдек, оилавий муаммоимга бор эътиборимни қаратишим кераклигини тушунтирганман. Улар мени тўғри қабул қилишди. Ушбу вазиятда Тожикистон футбол федерациясига менинг мураббийлар штабимни, ассистентлар жамоамни Тожикистон терма жамоасида қолдиришгани учун раҳмат айтишим керак. Чунки бу шахсан менинг қарорим эди.

Менинг ортимдан жамоам штабдан кетишини хоҳламагандим. Ростдан ҳам уларга имконият берилиб, ҳозирда ривожланишни давом эттиришяпти. Тожикистон футболи жуда яхши ўзгаришларга эришди ва тўғри йўлда деб ҳисоблайман. Ассистентларим ҳам мен билан гаплашганларида муваффақиятли, ривожланиш йўлини биргаликда давом эттиришимиз кераклигини айтиб ўтишганди. Лекин ўша вазиятда мен ушбу қарорни қабул қилишга мажбур эдим. Умид қиламанки, Тожикистон терма жамоаси ўша таркиб ва мураббийлар штаби билан муваффақиятларга эришишда давом этишади.

Мен Тожикистон миллий терма жамоаси бош мураббийи сифатида ўз ишимни бажардим. Ҳозир жамоани икки йил олдингидан анча юқори даражада деб айтишим мумкин. Қайсидир маънода уларга энди мен керак эмасман. Энди мен олдинга қараб интилишим керак. Кейинги ҳафтада Тожикистонга бораман. Расмий тарзда Тожикистон аҳлига ўз хайрлашувимни изҳор этаман. Ушбу расмий хайрлашуви Тожикистон футбол федерацияси ҳамда футболчилар олдида менинг қарзим деб ҳисоблайман. Чунки уларни соғинганман. Шу боис барчаси билан расман хайрлашиб кетишим тўғри бўлади, деб ўйлайман.

- Эшитишимча, терма жамоада ишлаган вақтингизда ёрдамчиларингизга ўзингиз маош тўлаб келган экансиз. Шу ростми?
- Мен Шекиладзени 17 йилдан бери биламан. Гелани тўртинчи миллий терма жамоага ўз ассистентим сифатида олиб келдим. У биринчи маротаба миллий жамоани бошқаряпти. 17 йилдан бери бир оиладек, ака-укалардек бўлиб кетганмиз. Тожикистонга келганимда тезлик билан Осиё Кубогида муваффақиятга эришиш учун менга мураббийлар жамоам кераклигини тушуниб етдим. Фитнес мураббий Владо Крунич, иккинчи скаут, таҳлилчи мураббий Желко Баленни таклиф қилдим. Бизда жуда яхши дўстлик муносабатлари бор. Айниқса, Тожикистондаги фаолиятимизда ажойиб иш кўрсатдик. Менинг футболдаги мотивациям доим муваффақиятлар бўлиб келган. Ҳеч қачон пул бўлмаган. Улар билан бирга Тожикистон футболини ривожлантириш йўлида ишлаганимдан фахрланаман.

- Тожикистон Осиё Кубогида янги тарих ёзди. Осиё Кубогидаги иштирокдан розимисиз?
- Ҳа, ҳеч қанақанги шубҳа йўқки, Тожикистон ўз тарихидаги биринчи Осиё Кубогида катта муваффақиятга эришди.

- Биламизки, сизда кучли мотивация бор ва уни футболчиларга бера олдингиз. Муваффақиятнинг асосий сабаби мотивациянгизми ёки тактиками?
- Тактика кучли футбол фалсафаси. Албатта энг муҳими, кучли ва ҳурматга сазовор етакчилик маҳоратини мураббийлар штабига ва футболчиларга тилаб қоламан. Тожикистондан миннатдорман. ТФФ менга эркин ишлаш имкониятини яратиб берди. 2022 йилнинг 27 январь куни шартномага имзо чеккан бўлсам, доим менинг қарорларимни, ўзгаришларни ҳурмат қилишди. Шунинг эвазига, ўйлашимча, ТФФ Осиёда бугунги кунда анчагина нуфузга эга. Нафақат мураббийлар штаби, балки футболчиларнинг ҳам ютуғи. Катта характер кўрсата олишди. Мана шу катта ғалабамизда ўзларининг улкан ҳиссаларини қўша олдилар. Замонавий футбол битта қаҳрамоннинг шоуси эмас. Жамоавий бирдамликни талаб қиладиган спорт тури ҳисобланади.

- Хизматингизга таклифлар бўлса керак. Режангиз қандай?
- Миллий терма жамоа мураббийи бўлиш учун сенда қуйидаги хислатлар бўлиши керак: юқори даражадаги машғулот ўтказиш билими, тактик билим, аниқ футбол фалсафаси, футболчилар ўртасида боғлам ҳосил қила олиш тажрибаси бўлиши керак. Энг муҳими, мураббий олдидаги катта вазифа одамлар, жамоа ичида ўзига яраша “гармония”ни топиб олиш. Жамоани, миллатни бир ёқадан бош чиқариб бир йўналишда бирлашиши учун қайсидир маънода шу нарсани топиши керак. Малдив, Афғонистон ва улардан олдинги жойларда ишлаганимдек Тожикистонда ҳам шу нарсалар содир бўлди.

Бу қийин вазифа. Сизга нафақат футболни тушунадиган, балки мамлакат маданияти, одамларни ва мамлакат футболини яхши тушуна оладиган мураббий керак бўлади. Келажагим нима бўлишини ҳозирча аниқ белгилаб олганим йўқ. Ҳозир ҳам шахсий оилавий муаммоларим билан бандман. Осиё Кубогидан кейин ҳеч қайси терма жамоа ёки клуб билан гаплашмадим. Осиё Кубоги давомида мен ва ёрдамчиларим қизиқарли таклифларни олдик. Бироқ ҳеч ким билан бир сонияга гаплашишга, музокара ўтказишга вақт ажратмадим.

Чунки Тожикистон термасининг муваффақиятини хавф остига қўйгим келмади. Ёрдамчиларимга ва футболчиларимга ҳам фокусни йўқотмасликни, бор эътиборни Тожикистон билан муваффақиятга эришишга қаратишини таъкидладим. Мураббийлар ва ўйинчилар менинг ушбу қароримни ҳурмат билан қабул қилишди, бунга амал қилишди. Албатта, ҳозир бошқача вазият. Бу менинг ўзлигим ва менинг характерим. Кимгадир ўзимни керак деб ҳис қилсам, албатта керакли қарорни қабул қиламан.

- Ўзбекистон ҳам Осиё Кубогида чорак финалдан қайтди. Бизнинг иштирокимизни қандай баҳолайсиз?
- Ўзбекистон совринларга жуда яқин эди. Бунга эриша олмаганига қарамасдан уларда сифат, характер – барчаси бор. Келгуси Осиё чемпионатларида, умуман ҳозирда бўлиб ўтаётган жаҳон чемпионати саралашида ҳам асосий мақсадига эриша олса, ўз салоҳиятини кўрсата олади. Ўзбекистонда жуда яхши футболчилар бор ва яхши мураббийлар штаби жамланган. Ёшлари ҳам жуда иқтидорли. Ўзбекистон футбол ассоциацияси ҳам бу йўналишда ўзини яхши кўрсатяпти ва ажойиб ишларни олиб бормоқда. Терма жамоангизни ЖЧ-2026 да кўришни жуда хоҳлардим, ўз навбатида Тожикистонни ҳам.

- Тожикистон термасида қўл остингизда тўп сурган ҳужумчи Шахром Самиев “Андижон”га ўтди. Бу ҳақида фикрингиз қандай?
- Самиев кучли футболчи. У Тожикистондаги энг иқтидорлардан бири. Шахром яхши клубга ўтди. Ўзига тўғри имкониятлар бериладиган бўлса, Осиё миқёсида янада кучли футболчи бўлиши мумкин. Яхши инсон. Футболчи сифатидаги характери ҳам мақташга арзигулик. Профессионал футболчи сифатида катта натижаларга эриша олади.

- Осиё Кубоги сизни янада машҳур қилди. Бундай ёшда машҳурликка эришиш осон эмас...
- Мен томонимдан муаммо йўқ. 15 йил олдин ҳам муваффақиятга эришгандим. Мисол учун Португалияга қарши ўйинда. Ўшанда Роналду, Пепе, Деку, Нани каби юлдузлари бор эди. Айтиш мумкинки, ҳаммаси қанча тез ўзгариш мумкинлигини жуда яхши ҳис қиламан. Буни табиий ва нормал жараён сифатида қарши оламан. Менда аллақачон профессионал мураббий сифатидаги 27 йиллик тажриба бор. Ушбу тажриба давомида 8 та мутлақо бошқа-бошқа давлатларда ўзига яраша малака орттирдим. Бу мени ушбу соҳада қайсидир маънода жон сақлаб қолишимга, оёққа туриб олишимда катта ёрдам беришига ишончим комил.

- Сизда футболдан ташқари бошқа бизнесингиз ҳам борми?
- Йўқ, менда фақат футбол. Чунки биламанки, бундан олдин футбол федерацияда техник директор сифатида ҳам фаолият олиб борганман. Бу ҳам ўзига яраша юқори даражадаги футбол ўрни. Лекин мен тўғриси ўзимни мураббийлик ишларимни, ундаги фаолиятимни кўпроқ яхши кўраман. Ишонаманки, тез орада яна ўзимга манзур бўладиган ишда имкониятга эга бўламан. Шу ўринда алоҳида айтиб ўтмоқчиманки, Тожикистон миллий жамоасидан бутун умрга миннатдорман.

Биз биргаликда ажойиб натижаларга эришдик. Лекин баъзида мураббий сифатида мана шундай оғир қарорларни қабул қилишга мажбурсан. Тожикистонга жаҳон чемпионати саралашида ва Осиё Кубокларида муваффақиятлар тилайман. Улар бунга лойиқ. Доим қўллаб-қувватлаб тураман ва кузатиб бораман. Қўлимдан келганича олисдан бўлса ҳам ёрдам беришга ҳаракат қиламан. Аммо ҳозир мен улар билан хайрлашишим ва ўз йўлимда давом этишим керак.

“Замин” янгиликларини “Telegram”да кузатиб боринг