Футбол дунёси яна анъанавий мукофот мавсумига кирди. Футбол тарихи ва статистикаси халқаро федерацияси (IFFHS) ўз расмий сайти орқали 2025 йилнинг энг яхши плеймейкери унвони учун даъвогарлар рўйхатини эълон қилди. Бу мукофот футболдаги энг ижодкор, пас маданияти юқори бўлган, ўйин ритмини бошқара оладиган ўйинчиларга берилади.
IFFHS ҳар йили энг яхши плеймейкер номига лойиқ бўлган футболчини аниқлайди. Ушбу рейтинг бутун йил давомида футболчининг нафақат статистикаси, балки ўйинга таъсир даражаси, жамоадаги етакчилик роли ва муҳим паллалардаги қарор қабул қилиш қобилияти асосида баҳоланади.
Жорий йилдаги шорт-листда дунё футболидаги энг иқтидорли ва замонавий услубдаги ярим ҳимоячилар жамланган. Улар қуйидагилар:
Арда Гулер (“Реал Мадрид”)
Бруну Фернандеш (“Манчестер Юнайтед”)
Коул Палмер (“Челси”)
Флориан Вирц (“Ливерпул”)
Жуд Беллингҳем (“Реал Мадрид”)
Кевин Де Брюйне (“Наполи”)
Ламин Ямал (“Барселона”)
Мартин Эдегор (“Арсенал”)
Педри (“Барселона”)
Витиня (“ПСЖ”)
Лионел Месси (“Интер Майами”)
Хамес Родригес (“Леон”)
Рео Ҳатате (“Селтик”)
Муҳаммад Қуддус (“Тоттенҳэм”)
Малик Тиллман (“Байер”)
Ушбу номзодлар орасида ёш ва тажрибали футболчиларнинг уйғунлиги диққатга сазовор. Масалан, 18 ёшли Ламин Ямал ёки Арда Гулер каби ёш иқтидорлар билан бир қаторда, элита даражасидаги юлдузлар — Беллингҳем, Де Брюйне ва Месси ҳам бор.
IFFHS’нинг таъкидлашича, ғолиб мавсум бўйича эмас, балки календар йили доирасидаги натижаларга кўра аниқланади. Яъни 2025 йил давомидаги барча расмий ва халқаро баҳслардаги иштирок, самарали паслар, ижодкорлик ва ўйинга таъсир асосий мезон бўлади.
Бу йилги номзодлар рўйхатида алоҳида эътиборни Жуд Беллингҳем ва Арда Гулер ўртасидаги рақобат қозониши мумкин. Чунки ҳар иккиси ҳам “Реал” таркибида ёш бўлишига қарамай, марказий ролни бажараётган ўйинчилар. Шу билан бирга, Лионел Месси ҳам ҳануз плеймейкер сифатида юқори савияда эканини исботлаб келмоқда — у МЛСда “Интер Майами” билан ажойиб мавсум ўтказмоқда.
Мутахассислар фикрича, бу йилги танлов фақат статистика билан эмас, ўйинга таъсир даражаси билан ҳам белгиланади. Масалан, Де Брюйне бу йил “Наполи” сафида ярим ҳимоя марказидаги универсал роли билан ажралиб тураётган бўлса, “Арсенал” етакчиси Мартин Эдегор ҳам Премьер-лигада жамоаси учун ҳал қилувчи аҳамиятга эга ўйинлар ўтказмоқда.
Овоз бериш жараёни аллақачон бошланган. Жаҳон бўйлаб спорт журналистлари, мураббийлар ва футбол экспертлари фикрларини тақдим этмоқда. Натижалар эса 10 декабрдан сўнг маълум бўлади.
Шу тариқа, дунё футболидаги энг ижодкор, энг “ақлли пас” устаси ким бўлиши яқин ойларда маълум бўлади. Мухлислар эса Беллингҳемнинг ёки Мессининг ғалабасини кутадими — ёки янги авлоддан кимдир тарихга киришни уддалайдими — буни вақт кўрсатади.
“Zamin”ни Telegram'да ўқинг!
