UzAuto Motors компанияси Chevrolet Damas моделининг янгиланган версиясини ишлаб чиқариш режасини эълон қилган эди. Made in Uzbekistan кўргазмасида мазкур автомобиль илк бор намойиш қилинди.
Янгиланган модель 1,5 литр ҳажмдаги, 16 клапанли тўрт цилиндрли DOHC двигатели билан жиҳозланган бўлиб, унинг қуввати 103 от кучига тенг. Автомобилнинг юк кўтариш қобилияти 720 килограммни ташкил этади, юкхонасининг ҳажми эса 3,1 кубометрга тенг.
Бу уни озиқ-овқат етказиб бериш, сервис хизматлари ва кичик логистика компаниялари учун қулай вариантга айлантиради. Моделнинг ғилдирак базаси 2850 мм, умумий узунлиги эса 4425 мм бўлиб, бу тор кўчаларда бошқаришни осонлаштиради.
Компакт ўлчамларга қарамай, салони кенг ва функционал: эргономик жойлашув, қулай рул бошқаруви ва амалий асбоблар панели билан ажралиб туради. 13 октябр куни компания янги Chevrolet Damas линияси ишлаб чиқарилиши бошланганини эълон қилди.
Янгиланган минивенлар янада ихчам, тежамкор ва сиғимдор бўлиб, кундалик фойдаланиш ва тижорий мақсадлар учун мос бўлиб қолади. Янги авлод Damas каттароқ ўлчамлари, орттирилган юк сиғими ва кенгайтирилган ички макони билан ажралиб туради.
Шунингдек, ҳайдовчи ва йўловчилар учун қулайлик сезиларли даражада оширилган. Модел икки хил версияда тақдим этилади ва янги авлод автомобили ҳозирги версия билан бирга ишлаб чиқарилади.
Бу харидорларга классик модель ва замонавий технологиялар билан жиҳозланган янги автомобиль ўртасида танлаш имкониятини беради. Ҳозирча Ўзбекистон бозоридаги версиянинг нархлари ва техник хусусиятлари ҳақида маълумот берилмаган.
