Лиссабонда бўлиб ўтган Чемпионлар лигаси учрашуви можарога сабаб бўлди: Винисиус Жуниор рақиб футболчи Жанлука Престианини ирқчиликда айблади. Бу ҳақда euro-football.ru хабар беради.
Ўйиндан кейин «Бенфика» бош мураббийи Жозе Моуриню клуб рамзи сифатида қора танли афсона Эйсабиуни тилга олди. Шунингдек, португалиялик мутахассис Винисиуснинг голни нисбатан провокацион нишонлаганини танқид қилиб, унинг хатти-ҳаракатга эътироз билдирди.
«Бавария» устози Венсан Компани эса Моуринюнинг бу позициясини нотўғри деб баҳолади. Унинг айтишича, Моуриню Винисиуснинг байрам қилиш услубини баҳона қилиб, футболчининг ўша вазиятда айтган гаплари ва ҳаракатини обрўсизлантиришга уринган ва бу катта хато бўлган.
Компани Эйсабию номи келтирилганига ҳам тўхталди: «Моуриню “Эйсабию борлиги учун «Бенфика» ирқчи бўла олмайди” деди. 60-йилларда қора танли футболчилар нималарни бошдан кечирганини биламизми? У Эйсабию билан сафар ўйинларига бориб, унинг кўрганларини кўрганми? Бугун Эйсабию номидан фойдаланиб, Винисиусга эътироз қилиш нотўғри», — деди Компани журналистларга.
Шу билан бирга, «Бавария» мураббийи Моуриню ҳақида шахсий жиҳатдан ёмон фикрда эмаслигини ҳам қўшди: у кўплаб футболчилар ва мутахассислар Моуринюни ҳурмат қилишини, мураббий клуб манфаатини ҳимоя қилаётганини, бироқ бу сафар хатога йўл қўйганини таъкидлади.
«Бавария» шанба куни «Айнтраҳт»ни қабул қилади.
“Zamin”ни Telegram'да ўқинг!
