Флик «Барселона» билан нимани орзу қилишини маълум қилди

"Барселона" бош мураббийи Ҳанс-Дитер Флик Ла Лига доирасида "Селта"га қарши ўйин олдидан матбуот анжуманида чиқиш қилди. У жамоанинг келажак режалари ва асосий мақсадлари ҳақида гапирди.

Флик ўз нутқида аниқ ва кучли позиция билдирди:

«Барселона» билан Чемпионлар лигасини ютиш — менинг асосий орзум. Ўйлайманки, биз буни яқин йилларда амалга ошира оламиз. Бунинг учун трансфер бозорида тўғри қарорлар қабул қилишимиз, хатолардан қочишимиз керак. Жамоада ривожланиш учун катта салоҳият бор ва тузилма ҳам яхши», — деди мутахассис.

Унинг таъкидлашича, натижаларга эришиш фақат майдондаги ўйинга эмас, балки клубнинг стратегик қарорларига ҳам боғлиқ. Тўғри трансфер сиёсати ва барқарор ривожланиш — асосий омиллардан бири.

Флик яна бир орзусини ҳам очиқлади:

«Яна бир орзум — янгиланган стадионда ишлаш. Қурилиш қачон тугашини билмайман, бу натижаларга ҳам боғлиқ. Мен қўлимдан келганини қиляпман ва бу ерда ўзимни жуда бахтли ҳис қиляпман. Ўзимни катта оиланинг бир қисми деб биламан», — деди у.

Ҳозирги кунда "Барселона" Флик раҳбарлигида йирик мақсадлар сари йўл олмоқда ва клуб мухлислари бу орзулар амалга ошишига умид қилмоқда.