Эл-Класико арафасида Барселона клубининг собиқ президенти Хосеп Мария Бартомеу шов-шувли баёнот билан чиқди. Унинг сўзларига кўра, ҳозирда Реал Мадрид юлдузи бўлган Винисиус Жуниор фаолиятининг бошида деярли каталонияликлар сафига ўтишига оз қолган эди. Бу ҳақда Goal.com хабар беради.
Бартомеунинг таъкидлашича, клуб ўша вақтда 17 ёшда бўлган Фламенго ҳужумчиси билан дастлабки келишувга эришган эди. Томонлар футболчи 18 ёшга тўлганидан сўнг шартнома имзолаш бўйича келишиб олишган, бироқ якунда Реал Мадрид яхшироқ таклиф билан чиқиб, бразилиялик иқтидор эгасини ўз сафига қўшиб олган.
Винисиус Жуниор кейинчалик бу маълумотни тасдиқлаб, Барселона молиявий жиҳатдан кўпроқ маблағ таклиф қилганини, аммо у спорт нуқтаи назаридан Реал Мадрид лойиҳасини маъқул кўрганини тан олган. Ҳозирда Винисиус Мадрид клуби сафида Ла Лига ва Чемпионлар лигаси ғолиби сифатида дунёнинг энг яхши ҳужумчиларидан бирига айланди.
Шунингдек, Бартомеу ўша даврда Кйлиан Мбаппе учун ҳам кураш олиб борганини маълум қилди. У футболчининг отаси билан бир неча бор мулоқот қилган, бироқ Пари Сен-Жермен клуби трансфер пойгасида ғолиб чиққан. Бартомеунинг фикрича, Мбаппе ўз ватанида қолишни ва француз клубида ўйнашни афзал кўрган.
“Zamin”ни Telegram'да ўқинг!
