Жаҳон футболи тарихидаги энг катта сирлардан бири яна муҳокама марказига чиқди. “Барселона” клубининг собиқ президенти Хосеп Мария Бартомеу Лионель Месси учун бир вақтлар фантастик даражадаги таклиф бўлганини ошкор қилди.
Испания ОАВга берган интервьюсида Бартомеу номи очиқланмаган клуб аргентиналик суперюлдуз учун 400 миллион евро тўлашга тайёр бўлганини маълум қилди.
Ушбу воқеа 2017 йилда, Неймарнинг “Барселона”дан “Пари Сен-Жермен”га 222 миллион евро эвазига ўтганидан кейин содир бўлган. Ўша трансфер ҳалигача футбол тарихидаги энг қиммат келишув сифатида қайд этиб келинмоқда.
Бартомеунинг айтишича, Неймар кетганидан кейин Европа грантларидан бири Мессини ҳам қўлга киритиш учун катта ҳаракат бошлаган.
“Бир клуб Неймар кетганидан кейин Месси учун 400 миллион евро таклиф қилди. Қайси клуб эканини айтмоқчи эмасман, аммо бу “Манчестер Сити” эмас эди. Кейин биз Лео ва унинг отаси билан учрашдик. Шундан кейин товон пулини янада ошириш ҳақида ўйлай бошладик”, — деди собиқ президент.
Бу баёнот футбол мухлислари орасида катта қизиқиш уйғотди. Чунки ўша даврда кўпчилик Мессининг “Манчестер Сити”га ўтиши мумкинлиги ҳақида тахмин қилар эди. Аммо Бартомеу бу версияни инкор қилди.
Мутахассислар фикрича, 400 миллион евролик эҳтимолий трансфер амалга ошганида, бу нафақат футбол, балки бутун спорт индустрияси тарихидаги энг катта келишувга айланган бўларди.
Бироқ барча муҳокамаларга қарамасдан, Лионель Месси ўша пайтда “Барселона”да қолишни афзал кўрди ва яна бир неча йил Каталония клуби шарафини ҳимоя қилди.
Аргентиналик юлдуз фақат 2021 йилда молиявий муаммолар ва клуб ичидаги вазият сабаб “Барселона”ни тарк этди. Кейинчалик у Франциянинг “Пари Сен-Жермен” клубига йўл олди.
Қизиғи шундаки, ўша вақтда клубнинг янги президенти Жоан Лапорта Месси учун тайёрланган янги шартномани бекор қилгани ҳам катта баҳсларга сабаб бўлган эди.
Футбол мухлислари эса ҳалигача бир савол устида бош қотирмоқда: агар ўша 400 миллион евролик трансфер амалга ошганида, футбол тарихи қандай ўзгарган бўлар эди?
“Zamin”ни Telegram'да ўқинг!
