Арсенал 22 йиллик танаффусдан сўнг Англия чемпиони бўлди

Арсенал 22 йиллик кутишдан сўнг яна Англия Премер-лигаси ғолибига айланди. Бунга Манчестер Сити жамоасининг Борнмут билан ўйиндаги кутилмаган дуранг натижаси сабаб бўлди. Пеп Гуардиола шогирдлари 1:1 ҳисобида очко йўқотгач, Лондон клуби муддатидан аввал чемпионликни расмийлаштирди. Бу ҳақда Goal.com хабар беради.

Учрашувда ҳисобни Эли Жуниор Кроупи очган бўлса, Эрлинг Холанд 90+5-дақиқада мувозанатни тиклади. Бироқ бу гол Манчестер Сити учун етарли бўлмади. Шу тариқа, Арсенал 2004-йилдан буён илк бор лига чемпионлигини қўлга киритди.

Арсенал энди ўз тарихидаги 13-чемпионлик унвони билан Чемпионлар лигаси финалига тайёргарлик кўради. Жамоа ҳал қилувчи баҳсда PSJ билан тўқнаш келади. Манчестер Сити учун эса мавсум якуни Пеп Гуардиола билан хайрлашувга айланмоқда.

ОАВ хабарларига кўра, Гуардиола ёзда жамоани тарк этади ва унинг ўрнини Энзо Мареска эгаллаши кутилмоқда. Манчестер Сити мухлислари мураббийни жамоада қолишга чақирган бўлса-да, клуб раҳбарияти ўзгаришларга тайёрланмоқда.

Nodirbek Razzokov

«ZAMIN.UZ» муҳаррири

+ Zamin.uz сайтини Googleга қўшинг