Португалия терма жамоаси бош мураббийи Роберто Мартинез 2026-йилги жаҳон чемпионатида Криштиано Роналдодан фойдаланиш бўйича ўз режалари билан ўртоқлашди. Мутахассиснинг таъкидлашича, афсонавий ҳужумчини турнир давомида бошқариш жараёни жуда табиий кечади ва клублардаги каби қатъий қолипларга таянмайди. Бу ҳақда Goal.com хабар беради.
Мартинез клуб ва терма жамоа ўртасидаги фарқни алоҳида қайд этди. Агар клуб мураббийлари узоқ мавсум давомида футболчиларнинг чарчоқ даражасини ҳисобга олишлари керак бўлса, жаҳон чемпионати каби қисқа муддатли турнирларда вазиятга қараб иш тутиш талаб этилади. Унинг сўзларига кўра, ёш ёки жисмоний кўрсаткичлардан кўра, ҳар бир ўйиннинг аҳамияти биринчи ўринга чиқади.
Португалия устози жамоа олдида дастлаб гуруҳ босқичидаги учта ўйин турганини ва барча эътибор айнан шу баҳсларга қаратилганини билдирди. У ўтган икки йил давомида Криштиано Роналдо билан бирга ўтказилган қарийб 40 та ўйин тажрибаси жамоа ичидаги муҳитни тўғри бошқаришга етарли эканлигига ишонч билдирмоқда.
Ал-Насср юлдузи учун бу турнир халқаро майдондаги сўнгги йирик мусобақа бўлиши кутилмоқда. Мартинез эса мураббийлар штаби ва сардор ўртасидаги ўзаро тушуниш ҳамда тўпланган маълумотлар турнир давомида юзага келадиган қийинчиликларни енгиб ўтишда асосий омил бўлишини таъкидлади.
“Zamin”ни Telegram'да ўқинг!
