Париж клуби Европадаги энг нуфузли мусобақада яна ўз кучини намойиш этди. Будапештда бўлиб ўтган УЕФА Чемпионлар лигаси финалида “ПСЖ” ва “Арсенал” клублари ўзаро тўқнаш келди. Учрашув асосий вақти 1:1 ҳисобида якунланди, ғолиб эса пенальтилар сериясида аниқланди.
Лондонликлар ўйинни жуда фаол бошлашди. 6-дақиқада “Арсенал” ҳужумчиси Кай Хаверц дарвозани ишғол қилиб, жамоасини олдинга олиб чиқди. Шу голдан кейин “ПСЖ” босимни кучайтирди ва иккинчи бўлимда ҳисобни тенглаштиришга эришди. 65-дақиқада Усмон Дембеле пенальтини аниқ бажариб, парижликларга муҳим голни тақдим этди.
Асосий вақтда ғолиб номи аниқланмагач, финал тақдири пенальтилар сериясига қолди. Унда “ПСЖ” футболчилари совуққонроқ ҳаракат қилишди ва 4:3 ҳисобида зафар қучишди. Луис Энрике бошчилигидаги жамоа шу тариқа ўтган мавсумдаги муваффақиятини такрорлаб, ўз тарихида иккинчи марта Чемпионлар лигаси кубогини қўлга киритди.
Бу ғалаба “ПСЖ” учун тарихий аҳамиятга эга бўлди. Париж клуби Чемпионлар лигасининг янги форматида кетма-кет чемпионликни қўлга киритган илк жамоа сифатида тарихга кирди. “Арсенал” эса финалда муносиб қаршилик кўрсатган бўлса-да, ҳал қилувчи лаҳзаларда омад “ПСЖ” томонида бўлди.
“Zamin”ни Telegram'да ўқинг!
