Бугун Ўзбекистон футбол ассоциациясида Илгиз Танташев бошчилигидаги ҳакамлар бригадасини ФИФА Жаҳон чемпионатига кузатиш олдидан махсус учрашув ташкил этилди. Тадбирда ЎФА мутасаддилари иштирок этиб, ҳакамларимизни тарихий мусобақа олдидан самимий қутлади ва уларга омад тилади.
ЎФА биринчи вице-президенти Равшан Эрматов ўз нутқида бу воқеа ўзбек футболи учун жуда катта аҳамиятга эга эканини таъкидлади. Унинг айтишича, терма жамоа ва ҳакамлар бригадасининг бир вақтнинг ўзида Жаҳон чемпионатида иштирок этиши одатда футболи ривожланган давлатларга хос ҳолат ҳисобланади. Бугун эса Ўзбекистон ҳам ана шундай мамлакатлар сафидан жой олмоқда.
“Сиз у ерда Ўзбекистон номидан майдонга чиқасиз ва миллионлаб футбол мухлисларида юртимиз ҳақида таассурот қолдирасиз. Албатта, масъулият ва босим юқори бўлади. Аммо сизларнинг бу синовларни муносиб енгиб ўтишингизга ишонаман”, — деди Равшан Эрматов.
У шунингдек, Ўзбекистон футбол ассоциацияси, ҳакамларнинг устозлари ва бутун футбол жамоатчилиги уларни доимо қўллаб-қувватлашини билдирди. Бу ишонч ҳакамларимиз учун катта руҳий куч бўлиши шубҳасиз. Чунки Жаҳон чемпионатида ҳар бир қарор, ҳар бир ҳуштак ва ҳар бир эпизод улкан эътибор марказида бўлади.
Илгиз Танташев бошчилигидаги ҳакамлар бригадасининг мундиалда иштирок этиши ўзбек ҳакамлик мактаби учун ҳам катта эътирофдир. Бу нафақат шахсий муваффақият, балки мамлакат футболидаги ўсиш, ишонч ва халқаро майдондаги обрўнинг белгиси ҳисобланади.
Тадбир якунида ҳакамлар бригадаси билан эсдалик суратга тушилди ва уларга ФИФА Жаҳон чемпионатидаги фаолиятида улкан муваффақиятлар тилаб қолинди. Қисқаси, ўзбек футболи учун яна бир тарихий саҳифа очилмоқда — бу сафар майдонда фақат футболчиларимиз эмас, ҳакамларимиз ҳам юртимиз номидан масъулиятли вазифани бажаради.
“Zamin”ни Telegram'да ўқинг!
