Ўзбекистон миллий терма жамоаси 1 июнь куни Канада терма жамоасига қарши ўртоқлик учрашувида майдонга тушади. Жаҳон чемпионати олдидан ўтказиладиган ушбу баҳс вакилларимиз учун муҳим синовлардан бири бўлади.
Мазкур учрашувда терма жамоамиз тўлиқ таркибда иштирок этиши кутилмоқда. Аввал хабар қилинганидек, ҳимоя чизиғимиздаги муҳим футболчилардан бири Абдуқодир Ҳусанов ҳам миллий жамоа йиғинига келиб қўшилди. Бу эса мураббийлар штаби учун таркибни янада кенгроқ синаб кўриш имконини беради.
Канадага қарши ўйин “Зўр ТВ” телеканали орқали жонли эфирда намойиш этилади. Шу сабаб мухлислар Жаҳон чемпионати олдидан “оқ бўрилар”нинг ҳозирги ҳолати, ўйин услуби ва футболчиларнинг тайёргарлик даражасини кузатиш имконига эга бўлади.
Эслатиб ўтамиз, Ўзбекистон миллий жамоаси Канада билан учрашувдан кейин яна Нью-Йоркдаги базасига қайтади. Фабио Каннаваро шогирдлари у ерда 8 июнь куни бўлиб ўтиши режалаштирилган Нидерландияга қарши ўртоқлик баҳсига тайёргарликни давом эттиради.
Қисқаси, Канадага қарши учрашув терма жамоамиз учун оддий назорат ўйини эмас, балки Жаҳон чемпионати олдидан муҳим текширув бўлади. Энди ҳар бир дақиқа, ҳар бир комбинация ва ҳар бир футболчининг ҳолати аҳамиятли — мундиал яқин, тайёргарлик эса максимум режимда кетмоқда.
“Zamin”ни Telegram'да ўқинг!
