Футбол мухлислари учун кутилган янгилик: FIFA бренди остида ишлаб чиқилган видеоўйинлар 2026 йилда мутлақо янги кўринишда яна саҳнага қайтади. BBC тарқатган маълумотларга кўра, ушбу ўйинларни ишлаб чиқиш ва нашр этиш ҳуқуқи Netflix платформасига ўтган.
Янги лойиҳа Delphi Interactive студияси раҳбарлигида амалга оширилади ва 2026 йилги футбол бўйича Жаҳон чемпионати арафасида тақдим этилиши режалаштирилган. Эътиборлиси, ўйин Netflix обуначилари учун мутлақо бепул бўлади. У iOS ва Android смартфонларида, шунингдек, айрим замонавий телевизор моделларида ишга туширилади.
Ўйин жараёнини бошқариш учун алоҳида геймпад талаб этилмайди — барча назорат смартфон орқали амалга оширилади. Бу эса Netflix’нинг интерактив контентга бўлган ёндашувини янада кучайтиришга қаратилган қадам сифатида баҳоланмоқда.
Маълумот учун, FIFA ўйинлари қарийб 30 йил давомида Electronic Arts томонидан ишлаб чиқилган эди. Бироқ 2023 йилда лицензия шартлари бўйича келишмовчиликлар сабаб EA ва FIFA йўлларини ажратишди. Шундан сўнг, EA ўз лойиҳасини EA Sports FC бренди остида давом эттирди. Ном ўзгаришига қарамай, EA FC 24 ўйини тижорий жиҳатдан жуда муваффақиятли чиқиб, 2023 йилда Буюк Британияда энг кўп сотилган ўйин бўлди.
FIFA президенти Жанни Инфантино эса Netflix билан тузилган янги ҳамкорликни “рақамли футбол тарихида янги саҳифа” деб атади. Унинг таъкидлашича, бу формат футбол ўйинларини глобал аудиторияга янада яқинлаштиради.
Шу билан бирга, мухлислар орасида фикрлар иккига бўлинган. Айримлар FIFA ўйинларининг асосан мобил платформаларга йўналтирилганидан хавотир билдирмоқда. Аммо бир нарса аниқ: футбол ва рақамли технологиялар уйғунлиги яна бир бор катта муҳокамаларга сабаб бўлмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
