Умуртқа поғонаси ва бўғимлар саломатлиги гарови бўлган 5 та витамин

Умуртқа поғонаси ва бўғимлар саломатлигига аҳамият бериш орқали мушак-скелет тизимини мустаҳкамлаш ҳамда яқин келажакда вужудга келиши мумкин бўлган бел оғриқларининг олдини олиш лозим. Чунки тез орада кириб келаётган куз фасли таъсирида организм ташқи омилларга нисбатан сезгирлиги ошади. Совуқ кунлар бошланиши билан суяклар учун муҳим витамин ҳамда минералларнинг кескин танқислиги юзага келади.

^{Фото: Marie Claire}
Организмда деярли барча фойдали элементлар (соч, тери, тирноқ, суяк, бўғим, томирлар) нинг бир қисми бўлган коллаген ва оқсилнинг табиий ишлаб чиқарилиши тахминан 25 ёшда тугайди. Шу пайтдан бошлаб юқорида кўрсатилган элементларнинг етишмаслигидан азият чекадиганлар суяк ва бўғимларни мустаҳкамлашга ёрдам берадиган қўшимча витамин, минераллар ва элементларни қабул қилиб бориши муҳим.

D3 витамини (холекалсиферол)

^{Фото: Marie Claire}
D3 витамини “қуёш” витамини деб ҳам аталади: у табиий равишда терида — ултрабинафша нурларининг бевосита таъсири остида ишлаб чиқарилади. Ушбу витаминни қабул қилиш учун салқин кунларда лосос ва бошқа турдаги ёғли балиқ, пишлоқ, сариёғ, қизил гўшт, балиқ жигари, қўзиқоринлар, сигир сути ва тухум сариғини истеъмол қилиш керак.

Бу витамин менопауза даврида ёки ҳомиладор аёллар учун кўпроқ муҳимдир. Холекалсиферол рахитнинг олдини олади, суякларнинг ўсишига ёрдам беради, скелетни қўллаб-қувватлайди, мушакларнинг тонусини оширади, гормонал ҳолатни барқарорлаштиради, аммо кальцийсиз сўрилмайди. Шунинг учун Д витамини кальций билан биргаликда қабул қилиниши керак.

Кальций инсон организмида энг кўп бўлган минералдир. У тиш ва суякларнинг саломатлиги учун жавобгар, шунинг учун остеопорознинг олдини олиш ва стоматологик харажатларни тежашни истасангиз, D3 + Cа нинг қондаги таркибини аниқлаб, дефицит ўрнини тўлдиришингиз лозим.

Глюкозамин ва хондроитин (хондроитин сулфат ва глюкозамин сулфат)

^{Фото: Marie Claire}
Ушбу моддалар тўқималарининг синтезида ва регенератив жараёнларида фаол иштирок этади. Улар жароҳат олганлар учун ажралмас компонентлардир: катта ёшдаги одамлар, спорт билан фаол шуғулланадиган спортчилар учун жуда фойдали.

Глюкозамин бўғимларни қўллаб-қувватлаш имконини беради, шунда бириктирувчи тўқима секинроқ эскира бошлайди ва тикланишга улгуради. Бу яллиғланишни, остеопороз ҳамда остеохондроз хавфини камайтиради. Ҳаракатсиз турмуш тарзи, ортиқча вазн, нотўғри овқатланиш, суяк ва бўғимларнинг касалликларига мойиллик глюкозамин ва хондроитин қўшимчаларини қўллаш учун кўрсатма ҳисобланади.

Креатин

Креатин — ўз ичига азотни олган карбон кислота, ҳар қандай ҳаракат ва энергия алмашинуви учун зарур бўлган табиий моддадир. Креатин учта аминокислотадан — глицин, аргинин ва метиониндан иборат бўлиб, кўпинча кислоталарни зарарсизлантириш ва мушак массасини ошириш учун оғир жисмоний машқларда қўлланилади.

Креатин метаболизмни тезлаштириш учун зарурдир. У организмда табиий равишда синтезланади, аммо табиий равишда кам ишлаб чиқарилади. Шунинг учун агар қўшимча равишда машқ қилсангиз ёки профессионал спорт билан шуғуллансангиз, ушбу табиий модда етарли бўлмайди. Креатинни озиқ-овқат билан истеъмол қилиш ёки қўшимча сифатида қабул қилиш мумкин.

Биотин (B7 витамини)

^{Фото: Marie Claire}
Гўзаллик витамини деб аталадиган биотин тери, тирноқ ва сочларнинг ҳолатига ижобий таъсир кўрсатади ва маълум аминокислота ҳамда ёғларни ишлаб чиқариш учун зарур ҳисобланади. Организмда унинг етишмаслиги натижасида сочлар тўкила бошлайди, тери қурийди ва дерматит кузатилади, кўпинча кўнгил айниши пайдо бўлади ва анорексия кучаяди.

Ушбу витаминнинг асосий манбаларидан бири — нон ва хамиртурушли бошқа маҳсулотлар, шунингдек, мол гўшти ва товуқ жигари, буйраклар, соя, турли ёнғоқлар, дон ва тухум сариғи. Бу витамин ўсимликка асосланган озиқ-овқатларда анча юқори миқдорда мавжуд, шунинг учун вегетарианлар уларни эътиборсиз қолдирмасликлари керак.

Мис

Мис — темирнинг қонда сўрилиши, табиий коллаген ва энергия ишлаб чиқариш учун масъул бўлган муҳим элемент. Табиий мис танқислиги камдан-кам учрайди ва кўпинча туғма касалликлар билан боғлиқ.

Шунингдек, мис катта ёшдаги одамлар учун ва жароҳатдан кейинги оғриқни бартараф этиш учун буюрилади. Мис кўплаб озиқ-овқатларда мавжуд, шунинг учун агар ушбу элементни истеъмол қилиш билан организмга ёрдам беришни истасангиз, рационга ғоз жигари, устрица, қўзиқорин, ясмиқ, бодом ва шоколадни киритиш тавсия этилади. “Замин” янгиликларини “Twitter”да кузатиб боринг