Ла Лига раҳбарияти “Вилярреал” ва “Барселона” ўртасидаги учрашув Майамида ўтказилмаслигини эълон қилди. Euro-football.ru ёзишича, “Вилярреал” клуби бу қарорни бир неча сабабга кўра норозилик билан қабул қилди.
“Вилярреал” вакиллари Ла Лига раҳбариятининг бу қарорини етарли даражада пухта режалаштирилмагани ва нотўғри ташкилотчилик сифатида баҳолади. Клуб, шунингдек, расмий баёнот ўйинчиларнинг Чемпионлар лигасидаги “Манчестер Сити”га қарши ўйини вақтида эълон қилингани ҳурматсизлик бўлганини таъкидлади.
Кутилишича, чоршанба куни “Вилярреал” клуби АҚШда ўтказилиши керак бўлган ўйин бекор қилиниши юзасидан расмий баёнот беради. Аввалроқ, “Барселона” ҳам ўйин бекор қилингани ҳақида расмий муносабат билдирган эди.
Ла Лига раҳбарияти хорижда ўйин ўтказиш ташаббуси устида бир неча йилдан бери иш олиб бормоқда. Келгусида бундай учрашувлар ўтказилиши мумкинлиги ҳақида турли тахминлар мавжуд.
