Kripto-valyuta bankomatlari operatori bo‘lgan Bitcoin Depot kompaniyasi sud jarayonlari va murakkab tartibga solish muhiti tufayli o‘z faoliyatini davom ettirishda jiddiy muammolarga duch kelayotganini ma’lum qildi. AQSh Qimmatli qog‘ozlar va birjalar komissiyasiga (SEC) taqdim etilgan hisobotda kompaniya moliyaviy barqarorligiga nisbatan shubhalar mavjudligi qayd etilgan. Bu haqda Cointelegraph.com xabar beradi.
Kompaniya moliyaviy direktori Devid Grey 2025-yilning to‘rtinchi choragida 20 million dollardan ortiq sud jarimalari va huquqiy xarajatlar yuzaga kelganini tasdiqladi. Shuningdek, AQShning turli shtatlari va munitsipalitetlarida kripto-bankomatlarni taqiqlovchi yoki cheklovchi qonunlarning qabul qilinishi kompaniya daromadlarining keskin kamayishiga olib keldi.
Hisobotga ko‘ra, 2026-yilning birinchi choragida Bitcoin Depot daromadlari o‘tgan yilning mos davriga nisbatan 80,7 million dollarga kamaygan. Kompaniya ushbu davrda 9,5 million dollar miqdorida sof zarar ko‘rgan. Tranzaksiyalar hajmining pasayishi tartibga soluvchi organlarning bosimi va kuchaytirilgan nazorat choralari bilan izohlanmoqda.
Kompaniya boshqaruvi inqirozdan chiqish uchun mart oyida MoneyGram kompaniyasining sobiq rahbari Aleks Xolmsni bosh direktor etib tayinladi. Biroq, bu yangilik investorlarning xavotirini bosa olmadi: Nasdaq birjasida BTM belgisi ostida sotilayotgan kompaniya aksiyalari narxi so‘nggi besh kun ichida 40 foizdan ko‘proqqa arzonlashib, 2,93 dollargacha tushib ketdi.
Vaziyatni yanada murakkablashtirayotgan omillardan biri bu Kanada hukumatining kripto-bankomatlarni butunlay taqiqlash bo‘yicha rejalari hisoblanadi. Hukumat ushbu qurilmalardan jinoiy guruhlar pul yuvish maqsadida foydalanayotganidan xavotirda. Ayni paytda Bitcoin Depot Kanadada 220 ga yaqin qurilmaga ega va bu taqiq kompaniya uchun navbatdagi jiddiy zarba bo‘lishi mumkin.
“Zamin”ni Telegramʻda oʻqing!
