Liverpul afsonasi Steven Gerrard jamoaning joriy mavsumdagi holatiga keskin baho berib, Arne Slot qoʻl ostida klub oʻzligini yoʻqotganini taʼkidladi. Sobiq sardor Muhammad Salahning ijtimoiy tarmoqlardagi shov-shuvli bayonotini jamoa ichidagi chuqur muammolarning yaqqol belgisi deb atadi. Bu haqda Goal.com xabar beradi.
Aston Villa bilan oʻyindagi magʻlubiyatdan soʻng, Muhammad Salah sukut saqlashni bas qilib, jamoani avvalgi shonli davrlariga qaytishga chaqirdi. Gerrardning fikricha, bu bayonot Arne Slot boshqaruvidagi muhit buzilganidan va futbolchilarning noroziligidan dalolat beradi.
TNT Sports efirida gapirgan Gerrard shunday dedi: "Bu juda qiziq holat. Muhammad Salah odatda kam gapiradi va bunday postlar yozmaydi. U tashqi dunyoga Liverpul kiyinish xonasida ishlar joyida emasligini, jamoa oʻzligini yoʻqotganini va bu uni qattiq ranjitayotganini bildirmoqchi".
Liverpul joriy mavsumda Angliya Premer-ligasida 12-bor magʻlubiyatga uchradi. Gerrard Muhammad Salahning "jamoa parchalanmoqda" degan soʻzlarini juda ogʻir va tashvishli deb baholadi. Uning soʻzlariga koʻra, murabbiy va futbolchilar zimmasidagi bosim nihoyatda yuqori, chunki koʻrsatilgan oʻyin klub darajasiga mutlaqo mos kelmaydi.
“Zamin”ni Telegramʻda oʻqing!
