Recursive Superintelligence startapi oʻzini oʻzi takomillashtiruvchi sunʼiy intellekt uchun 650 million dollar jalb qildi
You.com asoschisi va taniqli tadqiqotchi Richard Socher sunʼiy intellekt sohasida yangi Recursive Superintelligence startapini ishga tushirdi. Loyiha inson ishtirokisiz oʻz arxitekturasini qayta qurish, zaifliklarni aniqlash va yaxshilash qobiliyatiga ega boʻlgan tizimlarni yaratishni maqsad qilgan. Kompaniya ushbu maqsadlar uchun 650 million dollar sarmoya toʻpladi. Bu haqda Ixbt.com xabar beradi.
Socherning taʼkidlashicha, loyihaning asosiy maqsadi ilmiy ishlar siklini toʻliq avtomatlashtirishdir. Bu gipotezalarni yaratish, ularni amalga oshirish va natijalarni tekshirish jarayonlarini oʻz ichiga oladi. Tizim biologik evolyutsiyaga oʻxshash tarzda doimiy ravishda moslashib, yangi rivojlanish usullarini topishga qaratilgan.
Startap jamoasiga Google DeepMind va OpenAI kabi yetakchi kompaniyalardan tajribali mutaxassislar jalb qilingan. Ular orasida Tim Rokteshel va Josh Tobin kabi sunʼiy intellekt boʻyicha taniqli tadqiqotchilar bor. Jamoa ikki modelning oʻzaro raqobati orqali tizimni rivojlantirish usulidan foydalanmoqda.
Recursive Superintelligence faqat fundamental tadqiqotlar bilan cheklanib qolmay, tez orada real mahsulotlarni ham bozorga chiqarishni rejalashtirmoqda. Socherning soʻzlariga koʻra, birinchi tijoriy yechimlar yaqin oylarda taqdim etilishi mumkin. Kelajakda esa bunday tizimlar uchun asosiy cheklov inson mehnati emas, balki hisoblash quvvatlari boʻlishi kutilmoqda.
“Zamin”ni Telegramʻda oʻqing!
