23 noyabr kuni Parijdagi Luvr muzeyida Madaniyat va san'atni rivojlantirish jamgʻarmasi tomonidan tashkil etilgan «Oʻzbekiston vohalarining moʻ'jizalari. Karvon yoʻllari chorrahasida» nomli koʻrgazma ochildi.
Foto: Telegram / Saida Mirziyoeva
Luvr dunyodagi eng katta va eng koʻp tashrif qilinadigan muzeylardan biri boʻlib, eng yirik va qimmatli badiiy asarlar toʻplamiga ega. Har yili bu erga 10 millionga yaqin sayyoh keladi.
Foto: Telegram / Saida Mirziyoeva
Foto: Telegram / Saida Mirziyoeva
Luvrning Rishele zali va Islom boʻlimida xronologik ketma-ketlikda joylashtirilgan beshta boʻlimdan iborat katta koʻrgazma makoni yaratildi. Bular — «Voha davlatlari va podshohliklari davri: Ipak yoʻlidagi madaniyatlarning muloqoti», «Oʻrta asrlar va san'atning gullab-yashnashi», «Markaziy Osiyoda islomning tarqalishi, madaniyat va fanda Uygʻonish davri», «Ibn Sinodan Chingizxongacha», «Buyuk imperiyalar davri: Temuriylar va Shayboniylar».
Foto: Telegram / Saida Mirziyoeva
Oʻzbekiston tarixining 1500 yildan ortiq davrini qamrab olgan koʻrgazma mamlakatimizning 16 muzeyidan 138 ta noyob ashyo, shu jumladan, koʻrgazma uchun maxsus restavratsiya qilingan 70 ta eksponatdan iborat. Shuningdek, Frantsiya, Buyuk Britaniya va AQShning yirik muzeylaridan keltirilgan 31 ta buyum koʻrgazmadan joy oldi.
Foto: Telegram / Saida Mirziyoeva
Ushbu koʻrgazma etakchi xorijiy OAV hamda blogerlar e'tiborini tortdi.
Mash: «Luvrda kelgusi olti oy davomida Oʻzbekiston namoyish etiladi»
Rossiyaning Mash internet-nashrining yozishicha, «Oʻzbekiston vohalarining moʻ'jizalari. Karvon yoʻllari chorrahasida» koʻrgazmasi har kuni 20 000 nafar sayyohni qabul qilishga tayyor.
«Oʻzbekiston prezidenti Shavkat Mirziyoev va uning qizi Saida rahnamoligida olimlarning toʻrt yillik hamkorlikdagi mehnati eramizdan avvalgi V-VI asrlarga oid 169 qadimiy eksponat uchun makon yaratildi. Devoriy surat, saroylar detallari, amaliy san'at buyumlari hamda Katta Langar Qur'oni sahifalari koʻrgazmada namoyish etilmoqda.
Hatto Makronning shaxsan oʻzi ham koʻrgazmaga tashrif buyurib, eksponatlarni koʻzdan kechirib, tashkilotchilarga minnatdorchilik bildirishga ham ulgurdi», — deb yozadi nashr.
360 tv: «Luvr kichik Oʻzbekistonga aylandi»
Luvr kichik Oʻzbekistonga aylandi. Sababi bu erda «Oʻzbekiston vohalarining moʻ'jizalari. Karvon yoʻllari chorrahasida» koʻrgazmasi ochildi. Ochilish marosimiga Emmanuel Makronning shaxsan oʻzi tashrif buyurdi.
«Agar Parijga kelgudek boʻlsangiz, albatta, koʻrgazmaga boring hamda VIII asrga oid Katta Langar Qur'oniga e'tibor qarating. Bu islom olamining eng muhim qoʻlyozmalaridan biri. Kitob aynan koʻrgazma uchun restavratsiya qilingan, jarayonga Luvr mutaxassislari ham jalb qilingan. Koʻrgazma kuratori Rokko Rantening soʻzlariga koʻra, bunday koʻrgazmani yana 30-40 yilsiz tashkillashtirish imkonsiz», — deb yozadi Rossiyaning 360 tv telekanali.
Sergey Minaev: «Oʻzbekiston tarixi haqida juda oz narsa bilamiz»
«Kelgusi yili Samarqand, ipak yoʻli hamda temuriylar davri, Oʻzbekiston tarixi haqidagi ‘Tarix darsi’ haqida koʻrsatuv qilaman. Bu haqda juda oz ma'lumotga egamiz. ‘Oʻzbekiston vohalarining moʻ'jizalari. Karvon yoʻllari chorrahasida’ koʻrgazmasi ahamiyatini uning kuratori Rokko Rantening soʻzlari aniq ifodalay oladi: Yaqin 30-40 yil ichida bunday koʻrgazmani tashkillashtirish imkonsiz», — deya fikr bildiradi rossiyalik yozuvchi Sergey Minaev.
«Antiglyanets»: «Frantsuzlar Evropa tashqarisida ham madaniyat mavjudligiga amin boʻldi»
Rossiyaning «Antiglyanets» Telegram-kanali ushbu koʻrgazmadan soʻng, «frantsuzlar Evropa tashqarisida ham madaniyat mavjudligiga amin boʻldi», degan fikrda.
«Parijga kelsangiz, koʻrgazmaga hech boʻlmasa Evropa tashqarisida ham madaniyat mavjudligiga amin boʻlgan frantsuzlarning hayratini tomosha qilish uchun boʻlsa-da tashrif buyuring. Eksponatlar — Dalvarzintepa va Xolchayon yodgorliklaridan topilgan eksponatlar, Varaxshadagi qizil rangli xonadan devoriy surat, Kofirqal'adan oʻymakor panno, Katta Langar Qur'oni sahifalari, Amir Temur maqbarasidan qoʻsh eshik, Afrosiyobdagi elchilar tasviri tushirilgan devoriy surat haqiqatan ham hayratingizga sabab boʻladi.
Oʻzim ham rejalashtirilgan shoppingni qoldirib, ertaga Luvrga qaytishimga toʻgʻri keladi. Agar kelgusi yilning mart oyigacha Parijda boʻlsangiz, koʻrgazmani oʻtkazib yubormang», — deyiladi Telegram-kanal xabarida.
Alyona Doletskaya: «Parijda uzoqroq muddatga qolib, bu goʻzallikdan bahra olsaydim»
Rossiyalik jurnalist Alyona Doletskaya «Oʻzbekiston vohalarining moʻ'jizalari. Karvon yoʻllari chorrahasida» koʻrgazmasini tomosha qilish uchun Parijda uzoqroq muddatga qolish istagini bildirdi.
«Oʻtgan yili Oʻzbekistonga sayohat qilgan edim, biroq koʻp narsani koʻrmaganim uchun albatta u erga yana borishim kerakligini tushundim. Parijda uzoqroq muddatga qolib, bu goʻzallikdan bahra olsaydim. Agar Nukusdagi Savitskiy muzeyidagi xazina bu erga olib kelinsa, Oʻzbekiston qanday qilib Parijni ‘portlatishinini’ tasavvur ham qila olmayman. Frantsuzlar hayratdan yoqa ushlagan boʻlardi», — deb yozadi Alyona Doletskaya.
Tina Kandelaki: «Oʻzbekiston Luvrni zabt etdi»
Rossiyalik taniqli jurnalist Tina Kandelaki oʻz oʻquvchilaridan ushbu koʻrgazmani oʻtkazib yubormaslikni soʻramoqda.
«Oʻzbekiston ‘Oʻzbekiston vohalarining moʻ'jizalari. Karvon yoʻllari chorrahasida’ hamda ‘Samarqandga yoʻl. Ipak va oltin moʻ'jizalari’ koʻrgazmalari vaqtida Luvr va arab dunyosi institutini zabt etdi. Saida Mirziyoeva kuratorligidagi koʻrgazmalarga tayyorgarlik soʻnggi uch yil davomida olib borildi. Oʻzbek va frantsuz olimlari hamkorligida bir necha marta arxeologik ekspeditsiyalar oʻtkazilib, ularda bir qancha noyob eksponatlar topildi. Luvrga tashrif buyuruvchilar ularni ilk marta koʻrish imkoniga ega boʻladi. Shuning uchun koʻrgazmaga tashrif buyurish imkoniyatini qoʻldan boy bermang, buning uchun hali sizda vaqt bor. U kelgusi yilgacha davom etadi», — deb yozadi Tina Kandelaki. “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
