Poytaxtda “Diyora nozik yo‘l” deb nomlangan hujjatli filmning maxsus yopiq premerasi bo‘lib o‘tdi. Ushbu ijod namunasi atrofidagi qiziqish shunchalik yuqori bo‘ldiki, tadbirga sportimiz rahbarlari, dzyudochimiz Diyoraning o‘zi va uning eng yaqin insonlari tashrif buyurdi. Har bir tomoshabinda film nafaqat xotira, balki iftixor uyg‘otgani ayni haqiqat.
Mualliflar ushbu loyihada yozgi Olimpiya o‘yinlarida o‘zbek qizlari orasida ilk bor oltin medal qo‘lga kiritgan Diyoraning hayot yo‘lini, orzulariga erishishdagi murakkab bosqichlarini, mehnat va sabr-matonat bilan to‘la safarini samimiy tarzda aks ettirishga harakat qilishgan. Filmda uning bolalikdan sportga bo‘lgan muhabbati, har bir g‘alaba ortidagi mashaqqatli mehnati va jamoasi bilan birga bosib o‘tgan sinovli kunlar keng yoritilgan.
Premera davomida tamoshabinlar nafaqat Olimpiyadagi ulug‘ zafarni, balki Diyoraning inson sifatida qanday xarakterga ega ekanini ham ko‘rish imkoniga ega bo‘lishdi. Uning yaqinlari va ustozlari ishtirok etgan intervyular filmga yanada chuqur mazmun bag‘ishladi.
MOQning ta’kidlashicha, ushbu film nafaqat sport ixlosmandlari uchun, balki har qanday orzu sari intilayotgan yoshlar uchun ham kuchli ilhom manbai hisoblanadi. Diyoraning hayot yo‘li, chin ma’noda, nozik yo‘l emas — iroda, matonat va o‘z-o‘ziga ishonish bilan to‘la bir katta saboqdir.
Shubhasiz, “Diyora nozik yo‘l” ko‘pchilik tomoshabinlar qalbida o‘z o‘rnini topadi va kelajakdagi yangi chempionlarni ruhlantirishda davom etadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
