«Fenerbahche»ning sobiq futbolchisi Linkoln Joze Mourinyoni keskin tanqid qildi. Portugaliyalik mutaxassis Istanbul klubini 2024–2025 yillarda boshqargan. Bu haqda euro-football.ru xabar beradi.
Linkolnning aytishicha, Mourinyo unga bergan va’dasini bajarmagan va bu holat futbolchida hurmatsizlik sifatida taassurot qoldirgan. «U juda ko‘p yutuqlarga erishgan, buni hech kim inkor qilmaydi. Ammo men uchun hayotda xarakter sovrinlardan ham muhim», — dedi u Fanatik nashriga bergan intervyusida.
Futbolchi ijara asosida «Hall Siti»ga ketishidan oldin Mourinyo bilan gaplashgani, murabbiy esa uni Portugaliyadagi yozgi yig‘inda ko‘rishni istashini bildirganini ta’kidladi. Linkoln mavsumni Angliyada yakunlab, yig‘inga chaqiruv kutgan, biroq keyinchalik Mourinyo u bilan muloqot qilishdan bosh tortib, sport direktoriga murojaat qilishni aytgan.
Linkolnning so‘zlariga ko‘ra, jamoa Portugaliyada bo‘lgan paytda u ham Portugaliyada uyida edi, shunga qaramay murabbiy uni Istanbulga yuborib, alohida shug‘ullanishni buyurgan. «Menga nisbatan adolatsiz va hurmatsiz munosabat bo‘ldi», — deya qo‘shimcha qildi u.
U, shuningdek, klub uchun ko‘p o‘yinlarda hatto o‘z pozitsiyasida bo‘lmasa ham bor kuchini berganini, og‘ir jarohatdan keyin esa qo‘llab-quvvatlash kutgani, ammo buni his qilmaganini aytdi. «Men boshqalar kabi mashhur futbolchi bo‘lmasligim mumkin, lekin maydonda doim oxirigacha harakat qilganman», — dedi Linkoln.
Hozirda Joze Mourinyo «Benfika»ni boshqarmoqda.
“Zamin”ni Telegramʻda oʻqing!
