Dunyo futbolidagi eng nufuzli sovrinlardan biri — «Oltin toʻp» uchun kurash allaqachon qizgʻin tus olmoqda. Goal nashri 2026 yil uchun yangilangan reytingni taqdim etdi va unda yetakchilar oʻzgarishsiz qoldi.
Roʻyxatning birinchi pogʻonasida Harri Keyn joy olgan. "Bavariya" hujumchisi barqaror oʻyini va yuqori samaradorligi bilan hozircha asosiy favorit sifatida koʻrilmoqda. Uning ortidan jamoadoshi Maykl Olise ikkinchi oʻrinni egallab turibdi.
Uchinchi pogʻonaga esa Lamin Yamal koʻtarildi. "Barselona" vingeri yosh boʻlishiga qaramay, yuqori darajadagi oʻyini bilan eʼtibor markazida turibdi.
Keyingi oʻrinlarda ham tanish nomlar joy olgan: Luis Dias, Erling Xoland, Kilian Mbappe, Usmon Dembele, Deklan Rays, Xvicha Kvaratsxeliya hamda Xulian Alvares kabi yulduzlar kuchli oʻnlikdan oʻrin olgan.
Qiziq jihati, tajribali superyulduzlar ham pozitsiyalarini yaxshilab oldi. Lionel Messi 15-oʻrindan 13-pogʻonaga koʻtarilgan boʻlsa, Krishtianu Ronaldu 17-oʻrindan 14-oʻringa koʻtarildi.
Maʼlumot uchun, oʻtgan yil ushbu mukofotni aynan Dembele qoʻlga kiritgan edi va u hozir ham daʼvogarlar orasida qolmoqda.
Qisqacha aytganda, bu reyting hali yakuniy qaror emas, balki yoʻl xaritasiga oʻxshaydi. Mavsum yakunigacha koʻp narsa oʻzgarishi mumkin — kimdir «uchib chiqadi», kimdir esa shovqinsiz pasayib ketadi. Futbolda esa intriga hali endi boshlandi.
“Zamin”ni Telegramʻda oʻqing!
