"Manchester Yunayted" klubi "Milan" hujumchisi Rafael Leaoni o'z safiga qo'shib olish choralarini ko'rmoqda. Ingliz jamoasi transfer narxini pasaytirish maqsadida o'zining bir nechta asosiy tarkib futbolchilarini taklif qilishga tayyor. Bu haqda Goal.com xabar beradi.
La Gazzetta dello Sport nashri xabariga ko'ra, mankunianliklar chap qanotni kuchaytirish uchun Leaoni asosiy maqsad sifatida belgilagan. Ular ushbu kelishuvga Manuel Ugarte, Markus Reshford yoki Joshua Zirkzeni kiritishni rejalashtirmoqda.
"Milan" odatda o'z yulduzlari uchun faqat pul talab qiladi. Biroq, Angliya Premyer-ligasida to'p surayotgan tajribali futbolchilarni olish imkoniyati muzokaralar yo'nalishini o'zgartirishi mumkin.
Leaoning amaldagi shartnomasi 2028-yilgacha mo'ljallangan.
Portugaliyalik futbolchining shartnomasida 175 million yevrolik tovon puli ko'rsatilgan. Shunga qaramay, "Milan" rahbariyati muzokaralarni taxminan 50 million yevro atrofida boshlashga qarshi emas.
26 yoshli vingerning klub bilan munosabatlari biroz sovuqlashgan.
Zirkze varianti "Milan" uchun ayniqsa qiziqarli bo'lishi kutilmoqda. Niderlandiyalik hujumchi Angliyaga ko'chib o'tishidan oldin ham italyan klubi e'tiborida bo'lgan.
U joriy mavsumda yetarli o'yin amaliyotiga ega bo'lmayapti.
Reshford hozirda "Barselona" safida ijara asosida to'p surmoqda va uning kelajagi so'roq ostida qolmoqda. Ugarte esa asosiy tarkibdan chetda qolgan hamda uning agenti Xorxe Mendesh mijoziga Yevropadan yangi jamoa qidirmoqda.
Agar Leao jamoani tark etsa, "Milan" hujum chizig'ini qayta qurishiga to'g'ri keladi. Klub kelasi mavsum uchun "Atletiko" hujumchisi Aleksandr Syorlotni asosiy nomzodlar qatoriga kiritgan.
“Zamin”ni Telegramʻda oʻqing!
