Futbol eksperti Aleksandr Tochilin «Yevro-Futbol.Ru» nashriga bergan intervyusida FIFA prezidenti Janni Infantino Rossiya jamoalariga qo'yilgan taqiqni bekor qilish kerakligi haqidagi bayonoti hamda OAVda tarqalgan MOK Rossiya sportiga nisbatan sanksiyalarni yaqin orada olib tashlashi mumkinligi bo'yicha xabarlarga munosabat bildirdi. Bu haqda euro-football.ru xabar beradi.
Tochilinning aytishicha, MOKning Milandagi yig'ilishida Rossiya sportiga qo'yilgan barcha cheklovlarni tez orada bekor qilish bo'yicha prinsipial qaror qabul qilingani haqidagi gaplar anchadan beri aylanib yuribdi. U bu xabarlar ro'yobga chiqishiga umid bildirdi va Rossiyasiz yirik musobaqalarda intriga ham, ommaboplik ham pasayishini Yevropa tomonlari ham tushunishini ta'kidladi.
Infantinoning Rossiyani chetlatish «ma'nosiz» ekani haqidagi fikrlariga to'xtalgan Tochilin, hozirgi vaziyat dunyoda ikki tomonlama standartlar va Rossiyaga nisbatan biryoqlama yondashuv borligini ko'rsatayotganini qayd etdi. Uning fikricha, vaqt o'tishi bilan o'zlari ham bunday ban mantiqsiz ekani ayon bo'layotganini ko'rmoqda.
Ekspert MOK sanksiyalarni olib tashlasa, bu futbolga ham bevosita ta'sir qilishi mumkinligini aytdi. Tochilin buning ortidan «zanjirli reaksiya» yuzaga kelib, boshqa tashkilotlar ham avvalgi qarorlarini qayta ko'rib chiqishini, ayniqsa MOK kabi yirik tuzilma buni birinchi bo'lib qilsa, qolganlar uchun presedent yaratilishini ta'kidladi.
Infantino kelajakda siyosiy sabablar bilan jamoalarni musobaqalardan chetlatishni qonunan taqiqlash kerakligini ham aytgandi. Tochilin bu g'oyani qo'llab-quvvatlab, sportning asosiy shiori siyosatdan xoli bo'lishi kerakligi, Rossiyaga nisbatan qabul qilingan qarorlar esa aynan shu tamoyilga zid ekanini bildirdi.
OAVda FIFA aprel oyidagi kongressda Rossiyaning xalqaro turnirlarga to'liq qaytishi masalasini muhokama qilishi mumkinligi ham yozilmoqda. Tochilin bunday muddatlarda qaytish ehtimolini inkor etmadi va bunday ma'lumotlar asossiz paydo bo'lmaydi, deya ijobiy ssenariy haqida o'ylash mumkinligini aytdi.
U Rossiyaga ruxsat berilgandan keyin ham ayrim raqiblar maydonga tushishdan bosh tortishi ehtimoli borligini tan oldi. Tochilinning fikricha, har bir tashkilotning reglamenti bor va kimdir uni buzsa, sababidan qat'i nazar, belgilangan intizomiy choralar qo'llanishi kerak; texnik mag'lubiyatlar berilishi boshqalarga ham bunday demarshlar faqat o'zlariga zarar keltirishini anglatadigan signal bo'ladi.
“Zamin”ni Telegramʻda oʻqing!
