Ўзбекистон Президенти Шавкат Мирзиёевнинг қарорига биноан, Тошкент шаҳрида ҳавони ифлослантираётган корхоналар саноат зоналарига кўчирилади. Шунингдек, айниқса, тунги соатларда фаолият юритувчи саноат объектларига нисбатан талаблар кучайтирилади.
Бошқа ташаббуслар қаторида корхоналарга экологик рухсатномалар ва лицензиялар бериш тартибини қайта кўриб чиқиш ҳам режа қилинган. Экологик талабларга жавоб бермайдиган транспорт воситаларидан фойдаланишни тақиқлаш ва кимёвий моддалар ҳамда ёқилғи устидан назоратни кучайтириш ҳам кўзда тутилган.
Махсус комиссия уч кун ичида шаҳарнинг экологиясига салбий таъсир кўрсатаётган барча объектлар – заводлар, қурилиш майдончалари ва транспорт воситаларини текширишни бошлайди. Кейинчалик ҳаво ифлосланишига сабаб бўлаётган корхоналар аниқланиб, уларга аниқ талаблар белгиланади.
Қурилиш майдонлари устидан назоратни кучайтириш ҳам режада бор. Қурилиш ташкилотларидан чангни бостирувчи, суғориш ва ҳаво тозалаш тизимларини ўрнатиш талаб қилинади.
Экологик меъёрларни бузадиган корхоналарнинг фаолиятини вақтинча чеклаш ёки тўхтатиш бўйича таклифлар тайёрланади.
Меҳмон гуруҳидаги фойдаланувчилар ушбу мақолага изоҳ қолдира олмайди.
