Ўзбекистон Ташқи ишлар вазири Бахтиёр Саидов Сомали Республикасининг илк элчиси Али Муҳаммаднинг ишонч ёрлиқларини қабул қилди. Бу ҳақда вазир ўзининг Телеграм-каналида маълум қилди.
"Мамлакатларимиз ўртасидаги ўзаро манфаатли ҳамкорликни турли истиқболли йўналишларда янада мустаҳкамлашга содиқлигимизни билдирдик", — деди Саидов. Сомали 2004-йил 17-февраль куни Ўзбекистон мустақиллигини тан олган.
Могадишу ва Тошкент ўртасида дипломатик алоқалар жорий йилнинг февраль ойи бошида ўрнатилган. Иккала давлат вакиллари Нью-Йорк шаҳрида декларация имзолаган.
2025-йилга келиб Сомали аҳолисининг сони 19,2 миллион кишига етиши прогноз қилинмоқда, жон бошига ялпи ички маҳсулот $1,9 мингни ташкил этади. Ўтган асрнинг 90-йилларида ушбу Африка давлатида бир қатор ҳарбий можаролар юз берган.
2009-йилдан бошлаб бугунги кунгача мамлакатда фуқаролар уруши давом этмоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
