Денгиз сатҳи уч метрга кўтарилиши мумкин — олимлар огоҳлантирмоқда

Олимларнинг янги тадқиқотларига кўра, денгиз сатҳи 75 йил ичида уч метргача кўтарилиши мумкин. Бу эса БМТнинг Иқлим ўзгариши бўйича ҳукуматлараро экспертлар гуруҳи (IPCC) томонидан берилган прогнозлардан анча юқори. Ушбу таҳлил дунё иқлим ўзгаришлари ва муз қатламларининг емирилиши ортидан юзага келиши мумкин бўлган хавфларни очиб бермоқда.

Копенгаген университети профессори Дорте Дал-Йенсеннинг таъкидлашича, денгиз сатҳининг бундай тез кўтарилиши аста-секин эмас, балки сакрашлар билан содир бўлиши мумкин. Унинг сўзларига кўра, ҳароратнинг 2-3 даражага ошиши натижасида дунё муз қатламларининг айрим қисмлари муқаррар равишда емирилади. Бу эса 2100 йилга келиб IPCC томонидан башорат қилинган 1 метрлик ўсишдан бир неча марта юқори бўлиши мумкинлигини кўрсатмоқда.

Дания учун жиддий таҳдид

Бундай вазият айниқса Дания каби денгиз сатҳига нисбатан паст ҳудудлар учун катта хавф туғдиради. Мамлакатнинг кўплаб қирғоқ ҳудудлари сув остида қолиши мумкин, бу эса аҳоли пунктлари ва инфратузилмаларни жиддий хавф остига қўяди.

Дал-Йенсен ва 28 нафар океанолог олимлар томонидан қўллаб-қувватланган ушбу тадқиқот, иқлим ўзгаришлари билан боғлиқ муаммоларга етарлича тайёргарлик кўриш зарурлигини яна бир бор тасдиқламоқда. Олимлар сиёсатчилар ва жамоатчиликни бу масалага жиддий ёндашишга чақирмоқда.

Океанлардаги муз қопламларининг камайиши

Яна бир жиддий масала — океанлардаги муз қопламларининг камайиб бориши. Европа Иттифоқининг Copernicus иқлим ўзгариши хизмати маълумотларига кўра, 2024 йил февраль ойида Арктика ва Антарктидадаги муз қопламларининг умумий майдони 16,04 миллион квадрат километрни ташкил этган. Бу эса 1979 йилдан бери кузатилган энг паст кўрсаткич ҳисобланади.

Иқлимшунослар ва мутахассислар бундай ўзгаришларга қарши курашиш учун қатор чора-тадбирларни кўриш лозимлигини таъкидлашмоқда. Улар қаторида карбон чиқиндиларини камайтириш, экологик барқарорликни таъминлаш ва иқлимга мослашиш бўйича стратегик режалар ишлаб чиқиш каби вазифалар бор.

Денгиз сатҳининг кескин кўтарилиши глобал иқлим ўзгаришининг оғир оқибатларидан бири ҳисобланади. Олимлар ва иқлимшунослар томонидан олиб борилган тадқиқотлар ҳукуматлар ва халқаро ташкилотлар учун жиддий огоҳлантириш бўлиб, тезкор чоралар кўриш зарурлигини кўрсатмоқда. Агар бу жараёнга нисбатан эътиборсизлик қилинса, келажакда кўплаб ҳудудлар сув остида қолиши ва экологик мувозанат бузилиши мумкин. “Замин” янгиликларини “Telegram”да кузатиб боринг