Жавоҳир Синдаровга чемпионлик учун хонадон совға қилинди

Ўзбекистонлик ёш шахматчи, гроссмейстер ва Ўзбекистонда хизмат кўрсатган спортчи Жавоҳир Синдаровга "Imarat Development" компанияси асосчиси Марат Хайруллаевич томонидан 2 хонали хонадон совға қилинди.

Компания раҳбари бу ҳақда ўзининг ижтимоий тармоқ саҳифасида маълум қилди. У видео пост остида қуйидаги мазмунда изоҳ қолдирди:

“Ҳақиқий ғалаба фақат майдонда эмас. У сабрда, тинимсиз интилишда ва ўзига бўлган ишончда намоён бўлади.

Бугун ёшларимиз эришаётган ютуқлар — келажагимиз қанчалик мустаҳкам эканининг яққол исботи. Айниқса, шахмат каби ақл спортида юқори натижаларга эришиш катта меҳнат ва мустаҳкам ироданинг маҳсулидир.

Шундай ёшлар бор экан, бизда умид бор. Олға, чемпион Жавоҳир Синдаров!”

Ушбу хабар ижтимоий тармоқларда кенг муҳокамаларга сабаб бўлди. Кўплаб фойдаланувчилар ёш чемпионни табриклаб, унга ҳавас қилишларини билдиришди. Айримлар эса фарзандларини ҳам шундай ютуқларга эришишини тилаб, илиқ изоҳлар қолдиришди.