Европа Иттифоқидан Россияга қаттиқ зарба: нефт нархи туширилади!

20-22 май кунлари Канадада «Катта еттилик» (G7) мамлакатлари молия вазирларининг йиғилиши ўтказилади. Мазкур тадбир доирасида Европа Иттифоқи денгиз орқали етказиб бериладиган Россия нефти учун белгиланган максимал харид нархини янада пасайтириш ташаббусини илгари суради. Бу ҳақда Европа Иттифоқининг иқтисодий масалалар бўйича комиссари Валдис Домбровскис маълум қилди, дея хабар бермоқда Reuters агентлиги.

Маълум қилинишича, Европа Иттифоқи бу чорани Россиянинг Украинага қарши ҳарбий тажовузи муносабати билан қўлланилаётган иқтисодий санкцияларнинг янги, кескинроқ босқичи сифатида муҳокама қилмоқда. Ҳозирги вақтда Россия нефти учун белгиланган нархнинг юқори чегараси бир баррель учун 60 долларни ташкил қилса, Европа Иттифоқи расмийлари бу рақамни бир баррель учун 50 долларгача туширишни режалаштирмоқда.

Европа Иттифоқининг исмини ошкор қилмаган юқори даражадаги расмийлари Reuters агентлигига бу таклиф ҳозирда фаол муҳокама қилинаётганини тасдиқлаган. Улар бу ҳаракат орқали Россиянинг ҳарбий харажатларини қисқартириш ва санкцияларнинг таъсирини оширишни мақсад қилишаётганини билдиришган.

Шунингдек, Европа Иттифоқи Украинага қарши тажовузкор сиёсат юритгани учун Россияга қарши бир вақтнинг ўзида «энг катта санкциялар пакети»ни тайёрламоқда ва бу янги чоралар тўплами 20 май куни ЕИ Ташқи ишлар кенгашининг йиғилишида эълон қилинади. Айтишларича, бу чоралар Россия иқтисодиётига янада кучли босим ўтказиш учун қўлланиладиган 17-жазо чоралари пакетини ўз ичига олади.

Ушбу янги санкциялар доирасида Россияга қарши иқтисодий тақиқлар рўйхатига яна 75 та янги жисмоний ва юридик шахслар қўшилади. Шунингдек, санкцияларни четлаб ўтиш учун хорижий байроқлар остида Россия нефти ва нефть маҳсулотларини ташувчи «соядаги флот»нинг 200 та кемаси ҳам рўйхатга киритилади. Бу билан Европа Иттифоқининг санкциялар рўйхатидаги шахслар сони 2500 тадан ошади, кемалар сони эса 300 га етади.

Бундан ташқари, Европа Иттифоқи гибрид таҳдидлар учун махсус санкциялар режими доирасида Россиядан яна 27 та юридик ва жисмоний шахсларга нисбатан янги чекловларни жорий қилади. Шунингдек, инсон ҳуқуқларини бузганлик учун глобал санкциялар рўйхатига Россиядан яна 28 та янги жисмоний ва юридик шахслар киритилиши кўзда тутилган.

Энг муҳими, ЕИ томонидан кимёвий қуроллардан фойдаланишга алоқадорлик сабабли Россияга қарши қўшимча санкциялар киритиш масаласи ҳам муҳокама қилинаётгани хабар қилинган. Хусусан, гап оммавий тартибсизликларни бостириш учун ишлатиладиган кимёвий моддалар ҳақида бормоқда. Европа Иттифоқи бу воситалардан Россия Украинадаги уруш вақтида фойдаланган деб ҳисобламоқда.

Zamin.uz таҳририяти халқаро сиёсат ва иқтисодий санкциялар бўйича мазкур жараёнларни диққат билан кузатиб боради. Европа Иттифоқининг ушбу кескин чоралари Россия сиёсатини ўзгартира оладими? Сиз бу ҳақда қандай фикрдасиз? «Замин»ни Telegram’да ўқинг!