Қуёшда яна бир ҳайратланарли космик ҳодиса кузатилди, деб хабар берди zamin.uz. 20 ноябрь кечаси Қуёшнинг шимолий қисмида Ер диаметридан 80 баравар катта улкан плазма тузилмаси шаклланиб, космосга отилган.
Олимлар бу кўтарилишни "қирол протуберанси" деб аташмоқда — чунки плазма тузилмасининг узунлиги бир миллион километрдан ҳам ошган. Бундай кўрсаткич Қуёшда йиллар давомида камдан-кам учрайдиган гигант фаолликдан далолат беради.
Қизиғи шундаки, худди шу ҳудудда уч кун олдин ҳам шунга ўхшаш кучли плазма булути отилиб чиққан. Мутахассислар бу иккала ҳодиса бир хил фаоллик маркази — 4274-рақамли ҳудуд билан боғлиқ бўлиши мумкинлигини айтишмоқда.
Айни шу минтақа яқинда Ердан кўринадиган ҳолатда бўлиб, йилнинг энг кучли чақнашларидан иккитасини — Х5.1 ва Х4.0 синфидаги портлашларни келтириб чиқарган эди. Ҳозир эса у Қуёшнинг орқа томонида ва тўғридан-тўғри кузатиб бўлмайдиган ҳолда жойлашган.
Олимлар ҳодисани синчиклаб ўрганмоқда. Аммо айни пайтда бу улкан плазма чиқиши Ерга хавф солмаслиги айтилмоқда — ҳодиса Қуёшнинг Ерга қарама-қарши томонида содир бўлган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
