ByteDance компанияси TikTok иловасининг АҚШ учун махсус янги версиясини тайёрламоқда. Бу лойиҳа илованинг мамлакатда тақиқланишига қарши чора сифатида амалга оширилмоқда.
Pravilamag нашрининг ёзишича, янги TikTok илова версияси ёз охири ва куз бошида ишга туширилиши кутилмоқда. Шу билан бирга, ҳозирдаги оригинал TikTok App Store'дан олиб ташланади. Иловадан фойдаланиб келаётган фойдаланувчилар янги дастурга ўтишлари керак бўлади, бироқ мавжуд версия 2026 йил мартгача ишлашда давом этади.
Ҳозирча янги илова ишчи ном сифатида M2 деб аталмоқда. Бу ном аниқ эмас ва илова расман тақдим этилгунга қадар ўзгариши мумкин. Айни пайтда TikTok юридик жиҳатдан M1 номи остида рўйхатдан ўтган.
TikTok'нинг бу қадамлари АҚШ қонунчилигининг сўнгги чекловларига жавобдир. 2024 йил май ойида АҚШ президенти Жо Байден махсус қонунни имзолади. Унга кўра, агар TikTok АҚШдаги бизнесини маҳаллий компанияга сотмаса, 2025 йил 19 январга қадар мамлакат ҳудудида тақиқланади.
2025 йил 19 январда илова ҳақиқатдан ҳам АҚШда ўз фаолиятини тўхтатди. Бироқ эртаси куни Дональд Трампнинг баёнотидан сўнг TikTok ишини қайта тиклади. 4 апрель куни Трамп ByteDance компаниясига TikTok'нинг АҚШдаги активларини сотиш учун яна 75 кунлик қўшимча муддат берди. Акс ҳолда, иловага тўлиқ тақиқ қўлланилади.
ByteDance TikTok'ни АҚШда ишлаши учун янги йўл қидирмоқда. Янги M2 иловаси эҳтимол, Америкадаги бошқа компания томонидан ишлаб чиқилган деб кўрсатилади. Бу мамлакат қонунчилигига мувофиқ равишда миллий хавфсизлик талабларини бажариш учун керак.
Бу айланма стратегия TikTok'нинг АҚШдаги миллионлаб фойдаланувчилари учун хизматни сақлаб қолиш имконини беради. Янги версияда мавжуд функциялар сақланиши ва фойдаланувчилар сезиларли фарқни ҳис қилмаслиги кутилмоқда.
TikTok'нинг сотилишига доир битим ҳозирда хавф остида. Бунинг асосий сабаби — Хитой ҳукумати Трамп томонидан жорий қилинган 34% миқдоридаги янги божлар туфайли ушбу битимни маъқулламади. Бу божлар аввалги таърифлар билан қўшилиб, умумий 54% гача етиши мумкин.
Айни пайтда, TikTok’нинг тақдири ҳам сиёсий, ҳам иқтисодий тортишувларга боғлиқ бўлиб турибди. Бу АҚШ ва Хитой ўртасидаги рақобатнинг янги босқичи бўлиши мумкин.
Дунё бўйича 1 миллиарддан ортиқ фойдаланувчиси бўлган TikTok дунёдаги энг оммалашган ижтимоий платформалардан бири бўлиб, Ўзбекистонда ҳам кенг аудиторияга эга. АҚШдаги блокировка ва янги илова атрофидаги воқеалар нафақат глобал интернет сиёсатини, балки дунёдаги технология ва медиа соҳаларидаги геосиёсий мувозанатни ҳам ўзгартириши мумкин.
Натижада, TikTok каби платформалар учун янги ҳуқуқий, техник ва геосиёсий реалликлар даври бошланмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
