Элдор Шомуродовнинг Туркияга кўчиб ўтганидан кейин қайта тикланган ўйинлари нафақат маҳаллий мухлисларни, балки Европадаги инсайдерлар ва клублар назарини ҳам ўзига қаратмоқда. Ўзбекистон миллий терма жамоаси сардори Италияни тарк этиб, «Истанбул Башакшеҳир» сафида майдонга туша бошлагач, яна ўша ишончли, қайноқ формасига қайтиб, тўпурарлик маҳоратини кучли тарзда намоён қилмоқда.
Шомуродовнинг Туркиядаги тикланиши — «Башакшеҳир» учун тўғри қарор
Ёзда «Рома» ўзбек форвардини кейинчалик сотиб олиш имконияти билан «Башакшеҳир»га ижарага берганди. Турклар учун бу қарор айни муддао бўлди — Элдор бирин-кетин учрашувларда жамоа учун ҳал қилувчи гўёки «қутқарувчи»га айланди. Мавсум давомида у ҳаракатчан ўйинлари билан клубни тезда ўз атрофига айлантириб олди.
Энди эса «Башакшеҳир» раҳбарияти Шомуродовни тўлиқ трансфер қилиш масаласини кун тартибига қўйди. Турк матбуоти ва инсайдерлар бу жараён январдаёқ амалга ошиши мумкинлигини таъкидламоқда.
Италия матбуоти ҳам сўзга кирди — «Рома» афсусда?
Италиянинг нуфузли манбалари, жумладан romaforever.it, ўзбек ҳужумчисининг Туркиядаги ташаббускор ўйинидан кейин римликларда хавотир пайдо бўлганини қайд этмоқда.
«Рома» мухлисларининг кўпчилиги эса ҳозирда жамоа ҳужум чизиғида самарадорлик етишмаётгани сабаб Элдорнинг кетганидан афсусда. Артём Довбик ёки Эван Фергюсон каби ҳужумчилар кутилган даражада ўйин намоён қилмаётгани орқали, «Шомуродовни олиб қолиш керак эди», деган фикрлар кенг муҳокама қилинмоқда.
Диққатга молик жиҳати — Элдор ўтган мавсум «Рома»да 37 ўйинда иштирок этиб, 7 гол ва 5 ассист қайд этганди. Аммо Туркиядаги кўтаринки руҳ, ишонч ва асосий таркибдаги барқарор ўрин унга яна бир бор порлаш имконини берди.
Трансфер шартлари қандай? Январда ҳал бўладими?
Таниқли инсайдер Филиппо Биафора маълумотларига кўра, «Башакшеҳир» Элдорни қишки трансфер ойида 2,8 миллион евро эвазига сотиб олиш имконига эга. Агар бу қарор январда амалга ошмаса, жамоа мавсумни Суперлигада ушлаб қолса, трансфер автоматик тарзда амалга оширилади.
«Рома» эса молиявий жиҳатдан бу битимни жуда манфаатли деб ҳисоблаяпти. Ёздаги ижара учун 3 миллион евро олган римликлар тўлиқ трансфердан яна 2,8 миллион евро ишлаб олади. Шу боис римликларнинг асосий саволи — бу жараён қачон амалга ошади?
Шомуродовнинг статистикаси — ўз-ўзига жавоб
Энг муҳим омил — Элдорнинг ўзи. Чунки 12 та ўйинда 8 та гол урган, тўпурарлар пойгасида пешқадамлар орасида турган ҳужумчини қайси клуб шунчаки қўлдан чиқарсин?
Romaforever.it журналисти Лука Мугнайоли ҳам шундай деб ёзади:
«Шомуродовга бўлган ишонч, самарадорлик ва ўйиндaги барқарорлик «Башакшеҳир»ни трансферни январдаёқ якунлашга мажбур қилиши мумкин».
Элдорнинг Туркиядаги порлаши унга янада кенг имкониятлар эшигини очмоқда. Унинг ўйини нафақат клуб, балки миллий терма жамоа учун ҳам катта куч. Хулоса битта: Элдор яна бир бор ўзини катта саҳнада қайтарди ва ҳозирча тўхташ ниятида эмас.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
