АҚШ президенти Доналд Трамп Исроилнинг Иордан дарёси Ғарбий соҳилидаги ишғол қилинган ҳудудларни аннексия қилиш ғоясини қатъий рад этди. Америка раҳбари 25 сентябр, пайшанба куни Оқ уйда ўтказилган матбуот анжуманида бу масала юзасидан ўз позициясини аниқ ифода қилди.
«Исроилнинг Ғарбий соҳилни қўшиб олишига ҳеч қачон йўл қўймайман. Йўқ, бу ҳолат рўй бермайди. Бу жараёнга чек қўйиш вақти келди», — дея Трампнинг сўзларини NBC News келтирди.
Оқ уй етакчисига журналистлар Исроил бош вазири Бинямин Нетаняҳу билан бу мавзуда суҳбат қурган-қурмаганини сўрашди. Трамп эса: «У билан гаплашдимми ёки йўқми, бу муҳим эмас. Бир нарсани аниқ айтаман — Исроилнинг Ғарбий соҳилни аннексия қилишига рухсат бермайман», деб жавоб қайтарди.
Мавзу Ғарб давлатлари — Франция, Буюк Британия, Канада ва Австралиянинг Фаластинни расман давлат сифатида тан олиши фонида янада долзарб аҳамият касб этди. Шу боис, Вашингтоннинг бу позицияси халқаро майдонда катта қизиқиш уйғотди.
Трампнинг баёноти, айниқса, АҚШ ва Исроил муносабатларида янги босқич бошланиши мумкинлигини кўрсатмоқда. Чунки Америка раҳбари биринчи бор очиқ-ойдин тарзда аннексия ғоясини рад этди ва бу борада ўзининг қатъий нуқтаи назарини билдирди.
«Замин»ни Telegram’да ўқинг!
