Ла Лиганинг 32-турида "Атлетико Мадрид" ўз майдонида "Атлетик Бильбао"ни қабул қилиб, ҳақиқий драматик руҳда кечган баҳсда 3:2 ҳисобида ғалаба қозонди.
Учрашув меҳмонларнинг фаоллиги билан бошланди. 23-дақиқада Айтор Паредес ҳисобни очиб, "Атлетик Бильбао"ни олдинга олиб чиқди. Биринчи бўлимда мезбонлар имкониятлар яратган бўлса-да, ҳисоб ўзгармади.
Иккинчи бўлимда эса "Атлетико Мадрид" бутунлай бошқача жамоага айланди. 49-дақиқада Антуан Гризманн мувозанатни тиклади. Ортидан 54-дақиқада Александр Сёрлот жамоасини олдинга олиб чиқди.
Беллашувнинг энг драматик лаҳзалари эса сўнгги дақиқаларга тўғри келди. Қўшимча вақтда Сёрлот яна бир бор ўзини кўрсатиб, 90+3-дақиқада дубль расмийлаштирди. Бироқ меҳмонлар ҳам таслим бўлмади — 90+7-дақиқада Горка Гурусета ҳисобни қисқартирди, аммо бу камлик қилди — 3:2.
Ла Лига. 32-тур
Атлетико – Атлетик 3:2
Голлар: Гризманн 49, Сёрлот 54, 90+3 – Паредес 23, Гуруcета 90+7
Атлетико: Облак, Лиоренте (Молина, 63), Пубил, Ланглет, Ружери, Симеоне (Ле Норман, 72), Коке (Варгас, 72), Барриос (Кардосо, 58), Баэна, Гризманн (Нико Гонсалес, 63), Сёрлот.
Атлетик: Унаи Симон, Горосабел, Вивиан, Паредес, Берчиче, Инйиго Руис, Рего, Иняки Уилямс (Беренгуэр, 70), Унаи Гомес (Сансет, 64), Нико Уилямс, Гурусета.
Шу тариқа, Диего Симеоне шогирдлари муҳим уч очкони қўлга киритиб, жами 60 очко билан 4-ўринни эгаллаб турибди. "Атлетик Бильбао" эса 41 очко билан 9-поғонада қолмоқда.
Қисқача айтганда, бу ўйин ҳақиқий футбол драмасига айланди. "Атлетико Мадрид" характер ва ирода ҳисобига ғалаба қозонган бўлса, мухлислар яна бир эсда қоларли кечани бошдан кечирди.
“Zamin”ни Telegram'да ўқинг!
