Bloomberg агентлиги таҳлилчилари Nvidia акцияларини АҚШ фонд бозори тарихидаги энг таъсирчан акциялардан бири деб баҳолади. Компания мисли кўрилмаган рекорд ўрнатди — биринчи марта унинг бозор қиймати 5 триллион долларга етди.
Эндиликда Nvidia'нинг умумий қиймати S&P 500 индексдаги 11 сектордан 6 тасининг умумий капитализациясидан ҳам юқори, шунингдек, аксарият давлатларнинг фонд бозорларидан ошиб кетди. Компания индекснинг 8,5 фоизини ташкил этади — бу кўрсаткич индексдаги энг кичик 240 та компаниянинг умумий улушидан каттароқдир.
Nvidia акцияларининг жадал ўсиши сунъий интеллектни ривожлантиришга қаратилган йирик инвестициялар билан боғлиқ. Microsoft, Amazon ва Meta каби IT-гигантлар яқин бир йил ичида капитал харажатларини тахминан 34 фоизга ошириб, 440 миллиард долларга етказишни режалаштирмоқда.
Бу маблағларнинг катта қисми айнан сунъий интеллект технологияларига йўналтирилади. Прогнозларга кўра, Nvidia'нинг даромади келгуси молиявий йилда 285 миллиард долларга етиши мумкин.
