Bloomberg agentligi tahlilchilari Nvidia aksiyalarini AQSh fond bozori tarixidagi eng ta'sirchan aksiyalardan biri deb baholadi. Kompaniya misli ko'rilmagan rekord o'rnatdi — birinchi marta uning bozor qiymati 5 trillion dollarga yetdi.
Endilikda Nvidia'ning umumiy qiymati S&P 500 indeksidagi 11 sektordan 6 tasining umumiy kapitalizatsiyasidan ham yuqori, shuningdek, aksariyat davlatlarning fond bozorlaridan oshib ketdi. Kompaniya indeksning 8,5 foizini tashkil etadi — bu ko'rsatkich indeksdagi eng kichik 240 ta kompaniyaning umumiy ulushidan kattaroqdir.
Nvidia aksiyalarining jadal o'sishi sun'iy intellektni rivojlantirishga qaratilgan yirik investitsiyalar bilan bog'liq. Microsoft, Amazon va Meta kabi IT-gigantlar yaqin bir yil ichida kapital xarajatlarini taxminan 34 foizga oshirib, 440 milliard dollarga yetkazishni rejalashtirmoqda.
Bu mablag'larning katta qismi aynan sun'iy intellekt texnologiyalariga yo'naltiriladi. Prognozlarga ko'ra, Nvidia'ning daromadi kelgusi moliyaviy yilda 285 milliard dollarga yetishi mumkin.
