2025 йил 5 ноябр куни Филиппиннинг марказий ҳудудларига "Калмеги" тайфуни урилиши натижасида камида 66 киши ҳалок бўлди, 400 мингдан ортиқ одам эвакуация қилинди. BBC хабарига кўра, энг кўп зарар Себу оролига етган, бу ерда бутун қишлоқлар сув остида қолган.
Ҳозирда 26 киши бедарак йўқолган деб эълон қилинган. Қурбонларнинг аксарияти сув тошқини пайтида ҳалок бўлган.
Себу провинциясида фавқулодда ҳолат эълон қилинди. Воқеа давомида шамол тезлиги соатига 130 километрга етган, натижада уйлар вайрон бўлган, йўллар автомобиллар ва бинолар қолдиқлари билан тўлган.
Ҳарбийлар қутқарув ишларига авиацияни жалб қилишган, аммо бир вертолёт ҳалокатга учраган ва олти нафар экипаж аъзоси ҳалок бўлган. Маҳаллий аҳолининг сўзларига кўра, сув даражаси жуда тез кўтарилган.
"Бизнинг уйимиз лой билан тўлган, қаердан тозалашни бошлашни билмаяпмиз", дейди Мандауе шаҳри аҳолиси. Тайфун кучсизланиб, Жанубий Хитой денгизи томон ҳаракатланмоқда ва яқин кунларда Вьетнамга етиб бориши мумкин.
